Tramp qysqa merzimdi saparmen Izraılge bardy
ASTANA. KAZINFORM – AQSh prezıdentiniń sapary Gaza sektoryndaǵy soǵystyń aıaqtalýy jáne Taıaý Shyǵysta jańa saıası kezeńniń bastalýyn kútken kezde ótip otyr, dep habarlaıdy Kazinform menshikti tilshisi.
AQSh prezıdenti Donald Tramp áýe kúshteriniń 1 ushaǵy búgin tańerteń Tel-Avıv mańyndaǵy Ben-Gýrıon áýejaıyna qondy. Ony Izraıl premer-mınıstri Bınıamın Netanıahý men prezıdent Itshak Gertsog kútip aldy.
Izraıl bıliginiń aqparatynsha, sapar shamamen tórt saǵatqa sozylady jáne Knessettiń plenarlyq otyrysynda sóz sóıleýden, Izraıl basshylyǵy jáne kepilge alynǵandardyń otbasylarymen kezdesýlerden turady. Odan keıin Tramp Gaza boıynsha kelisimge qol qoıý rásimine qatysý úshin Sharm-esh-Sheıhke ushady.
Ushý kezinde Tramp Air Force One-nan Gazadan ızraıldik tutqyndardy bosatý týraly tikeleı translıatsııany kórdi. Aq úıdiń baspasóz hatshysy Kerolaın Levıtt ekran fotosýretin jarııalap, oǵan «History in the making» degen jazba qaldyrdy.
Izraıldiń 12-shi telearnasynyń habarlaýynsha, Donald Tramp Air Force One ushaǵy Ben-Gýrıon áýejaıyna qonar aldynda «Tutqyndar alańy» jáne jaǵajaılarda demalyp jatqan ızraıldikterdiń ústinen tómen ushýyna buıryq bergen. Tel-Avıv jaǵajaıynda AQSh prezıdentin qarsy alý sózderi jazylǵan úlken banner ornatyldy.
Tramp saparyn Gaza kelisimindegi ilgerileýshilikpen baılanystyryp, bitimgershiliktiń saqtalýyn kútetinin málimdedi.
- Gazadaǵy soǵys aıaqtaldy. Bitim saqtalady, adamdar áskerı áreketten sharshady. Men kóptegen kepil aldym, eshkim meni jaısyz jaǵdaıda qaldyrǵysy kelmeıdi dep oılaımyn, - dedi Tramp Vashıngtonnan ushar aldynda qol jetkizilgen kelisimderdiń oryndalatynyna senim bildirip.
AQSh prezıdenti sondaı-aq kelissózge deldal bolǵan Qatarǵa alǵys aıtyp, Gaza sektoryn qalpyna keltirý «ýaqytty qajet etetinin, biraq sońynda bári jaqsy kórinetinin» basa aıtty. Tramptyń aıtýynsha, AQSh Gaza sektorynda ýaqytsha basqarý organyn qurýǵa yqpal etýdi kózdep otyr jáne yqtımal qatysýshylardyń qatarynda Ulybrıtanııanyń burynǵy premer-mınıstri Tonı Blerdiń de bar ekenin qosyp ótti.
Osy arada Ierýsalımde «Kógildir qalqan-6» operatsııasy aıasynda qaýipsizdiktiń joǵary rejımi engizildi. Operatsııaǵa AQSh prezıdentimen birge erip júrgen jáne kepilge alynǵandardy qaıtarý kezinde tártipti saqtaýda myńdaǵan polıtsııa men áskerı qyzmetker qatysyp jatyr.
Eske sala ketsek, dúısenbide HAMAS kepilge alynǵan jeti ızraıldik azamatty Qyzyl Krest uıymyna tapsyrdy.