Tramp: Qyrym men NATO-ǵa kirýden bas tartsa ǵana, Zelenskıı soǵysty toqtata alady

ASTANA. KAZINFORM — AQSh-tyń prezıdenti Donald Tramp Ýkraına prezıdenti Vladımır Zelenskıı Qyrymnan bas tartyp, eldiń NATO-ǵa kirý josparyn doǵarsa ǵana, Reseımen soǵysty dereý toqtata alady dep málimdedi, dep jazdy BBC. 

— Ýkraına prezıdenti Zelenskıı Reseımen soǵysty birden toqtata alady, eger ózi qalasa, nemese kúresti jalǵastyra beredi. Esterińizde bolsyn, bári qalaı bastaldy. Qaıtadan Qyrymdy qaıtarý joq — ol Obama kezinde (12 jyl buryn, bir oq atylmastan!) berildi — jáne Ýkraına úshin NATO-ǵa KІRÝ JOQ. Keıbir nárseler eshqashan ózgermeıdi, — dep jazdy Tramp óziniń Truth Social jelisindegi paraqshasynda, Zelenskııdiń Aq úıge sapary qarsańynda.

Zelenskııdi dúısenbi kúni Vashıngtonǵa sapary barysynda Ulybrıtanııa, Italııa, Germanııa, Frantsııa jáne Fınlıandııa elderiniń basshylary, sondaı-aq NATO Bas hatshysy men Eýropalyq komıssııa tóraıymy ertip júredi.

— Erteń Aq úıde eleýli kún bolady. Mundaı kóp eýropalyq lıderler bir ýaqytta eshqashan jınalmaǵan. Olarmen kezdesýdi ótkizý — men úshin úlken qurmet, — dep jazdy Tramp basqa bir jazbasynda.

CNN málimetinshe, Tramptyń bul málimdemesi Zelenskııdiń Aq úıdegi kezdesýde qandaı qysymǵa tap bolatynyn kórsetedi.

— Tramp ataǵan eki shart — Ýkraına Qyrymnan bas tartýy jáne eshqashan NATO-ǵa kirmeýge kelisýi — bul Vladımır Pýtın soǵysty toqtatý úshin qoıǵan talaptar tizimine kiredi, — dep jazady telearna.

Buǵan deıin habarlanǵandaı, Aq úı Ankorıdjdegi «qupııa qujattar» oqıǵasyna qatysty aıyptaýǵa jaýap berdi.