Tramp Kıevti Reseıdegi munaı óńdeý zaýyttaryna shabýyl jasamaýǵa úndedi
ASTANA. KAZINFORM — AQSh Prezıdenti Donald Tramp álemdegi dızel otyny tapshylyǵy Taıaý Shyǵystaǵy jaǵdaıǵa emes, Reseı men Ýkraına arasyndaǵy soǵysqa baılanysty ekenin aıtty. Reseı munaı óndirý boljamyn keıingi 17 jyldaǵy eń tómengi deńgeıge deıin túsirdi. Bul týraly PBS News jazdy.
Donald Tramp Ýkraına prezıdenti Vladımır Zelenskııdi Reseıdiń dızel otyny ınfraqurylymyna jasalyp jatqan soqqylardy toqtatýǵa úndedi. Aq úı basshysy bul týraly 13 qyrkúıek, jeksenbi kúni óz otbasyna tıesili alańda ótken Irish Open golf týrnırine barǵan kezde jýrnalısterge aıtty.
— Biz bul máseleni Zelenskıı myrzamen talqyladyq. Basqa da kóptegen nysan bar. Reseıdegi dızel otynyna shabýyl jasaýdy toqtatýyńyz kerek. Bul búkil álemge zııanyn tıgizip jatyr, — dedi Tramp.
Onyń aıtýynsha, álemdegi dızel otyny tapshylyǵy «Taıaý Shyǵystaǵy jaǵdaıdan emes, Reseı men Ýkraınada bolyp jatqan oqıǵalardan» týyndaǵan.
Tramp bul málimdemesin juma kúni AQSh-ta dızel otynynyń baǵasy rekordtyq deńgeıge jetip, bir gallony orta eseppen 6 dollardan asqannan keıin jasady.
Ýkraına birneshe aıdan beri Reseıdiń munaı-gaz salasyna alys qashyqtyqtan soqqy berip keledi. Bul el aýmaǵynda janarmaı jetkizilimine shekteý engizilýine ákeldi. Al Máskeý shilde aıynda dızel otynyn eksporttaýǵa tyıym saldy. Sonyń saldarynan álemdik naryqtaǵy onsyz da shekteýli dızel otynynyń kólemi odan ári qysqardy.
Eske salaıyq, buǵan deıin AQSh Ýkraınadaǵy jaǵdaıǵa baılanysty Máskeý, Kıev jáne Vashıngtonnyń qatysýymen ótetin úshjaqty kelissózdi qaıta jandandyrýǵa nıetti ekenin jazǵanbyz.
