Fýtboldan álem chempıonaty: Tramp keńesshisi Irandy Italııamen almastyrýdy usyndy
ASTANA. KAZINFORM - Atalǵan bastama soǵys jaǵdaıynda túrli suraq týdyryp, fýtbol jáne saıası ortada saqtyqpen qabyldandy, dep habarlaıdy Kazinform agenttiginiń menshikti tilshisi.
AQSh prezıdenti Donald Tramptyń arnaıy ókili Paolo Zampollı Halyqaralyq fýtbol federatsııasyna (FIFA) aldaǵy álem chempıonatynda Iran quramasynyń ornyna Italııany qosý múmkindigin qarastyrýdy usyndy. Týrnır AQSh, Kanada jáne Meksıkada ótedi, dep jazady Financial Times.
— Men Donald Trampqa jáne FIFA prezıdenti Djannı Infantınoǵa Italııa quramasyn álem chempıonatyna qosý týraly usynys jasadym, — dedi Zampollı.
Onyń aıtýynsha, tórt dúrkin álem chempıony Italııa quramasyn AQSh-ta ótetin týrnırde kórý ózi úshin «arman» bolyp tabylady.
— Men ıtalııalyqpyn, sondyqtan Italııa quramasynyń AQSh-ta ótetin chempıonatqa qatysqanyn qalaımyn. Tórt chempıondyq ataq — týrnırge laıyq ekenin dáleldeıtin jetkilikti tájirıbe, — dedi ol.
Basylymnyń málimetinshe, bul usynys Tramp pen Italııa premer-mınıstri Djordja Melonı arasyndaǵy qarym-qatynasty jaqsartýǵa baǵyttalǵan qadam bolýy múmkin. Buǵan deıin Melonı AQSh prezıdentiniń Iranǵa qarsy soǵysqa baılanysty Rım Papasy Lev XIV-ke aıtqan syndaryn qoldamaǵany úshin eki tarap arasynda kelispeýshilik týǵan.
Bı-bı-sı agenttiginiń FIFA-daǵy derekkózderge silteme jasap habarlaýynsha, uıym qazirgi tańda Irandy Italııamen almastyrý josparyn qarastyryp otyrǵan joq. FIFA resmı túrde pikir bildirmegenimen, uıym prezıdenti Djannı Infantıno buǵan deıin «Iran quramasy mindetti túrde qatysady» dep málimdegen.
Aıta keteıik, Italııa quramasy irikteý kezeńinen óte almaı, Bosnııa jáne Gertsegovına quramasynan jeńilip, qatarynan úshinshi ret álem chempıonatyna qatyspaı qaldy.
Iran quramasynyń týrnırge qatysýy AQSh pen Izraılmen soǵysqa baılanysty kúmán týdyrǵanymen, Tegeran komandasynyń chempıonatqa daıyndalyp jatqanyn jáne belgilengen keste boıynsha óner kórsetýge nıetti ekenin málimdedi.
Buǵan deıin Iran fýtbol federatsııasynyń prezıdenti Mehdı Tadj FIFA-men matchtardy AQSh-tan Meksıkaǵa kóshirý máselesin talqylap jatqanyn aıtqan. Al Meksıka prezıdenti Klaýdııa Sheınbaým Iran quramasynyń oıyndaryn óz elinde ótkizýge daıyn ekenin bildirgen.
Italııada bul usynys synǵa ushyrady. Eldiń sport mınıstri Andrea Abodı týrnırge qatysý sporttyq nátıjelermen anyqtalatynyn aıtyp, mundaı bastamalardy orynsyz dep baǵalady.
FIFA erejelerine sáıkes, komanda quramyn ózgertý týraly sheshimdi tek uıymnyń ózi qabyldaıdy.
Álem chempıonaty 11 maýsymda bastalady. Iran quramasy toptyq kezeńde Jańa Zelandııa, Belgııa jáne Mysyr quramalarymen kezdesýi tıis.
Osyǵan deıin FIFA bıylǵy ÁCh matchtary bıletteriniń jańa partııasyn satylymǵa shyǵarǵany týraly jazdyq.