Tramp keńesshisi: AQSh 10 jyl ishinde tarıfterden 6 trln dollar tabys tabady

ASTANA. KAZINFORM — Pıter Navarro AQSh avtomobıl ónerkásibindegi tarıfterden ǵana shamamen 100 mlrd dollar tabys kútip otyrǵanyn atap ótti. Bul týraly TASS habarlady.

AQSh-tyń ımporttyq bajdan túsetin kirisi on jyl ishinde shamamen 6 trln dollar bolmaq. Bul týraly AQSh prezıdenti Donald Tramptyń saýda jáne óndiris jónindegi aǵa keńesshisi Pıter Navarro málimdedi.

— Baj jylyna shamamen 600 mlrd dollar ákeledi, bul on jyl ishinde shamamen 6 trln dollar bolady, — dedi ol Fox News telearnasyna bergen suhbatynda.

Navarronyń aıtýynsha, AQSh tek avtomobıl ónerkásibine qatysty bajdan shamamen 100 mlrd dollar tabys kútedi. Sondaı-aq, ol Tramp ákimshiligi amerıkalyq kólikterdi satyp alatyndarǵa salyqtyq jeńildikter engizýdi josparlap otyrǵanyn atap ótti.

10 aqpanda Tramp barlyq ımporttalatyn bolat pen alıýmınııge 25% kóleminde kedendik baj engizýdi tapsyrdy. Bul sheshim 12 naýryzda kúshine endi jáne Avstralııa, Argentına, Brazılııa, Ulybrıtanııa, Eýropalyq Odaq, Kanada, Meksıka, Ońtústik Koreıa jáne Japonııadan jetkiziletin ónimderge qatysty.

4 naýryzda AQSh ákimshiligi Kanada men Meksıkadan keletin ımporttyń basym bóligine 25% kedendik baj saldy, sondaı-aq Qytaıdan ákelinetin taýarlarǵa tarıfterdi 10%-dan 20%-ǵa deıin kóterdi.

6 naýryzda Tramp Kanada men Meksıkadan ımporttalatyn, úshjaqty saýda kelisimine jatatyn taýarlarǵa 25%-dyq ımporttyq baj engizýdi 2 sáýirge deıin keıinge qaldyrý týraly jarlyqtarǵa qol qoıdy. Ol osy kúnnen keıin eshqandaı jeńildikter bolmaıtynyn eskertti.