Tramp keme ekıpajiniń 250 kúnnen astam portqa kirmegenin synaǵandarǵa jaýap berdi
ASTANA. KAZINFORM — AQSh prezıdenti Donald Tramp Iran jaǵalaýyndaǵy USS Abraham Lincoln ushaq tasymaldaýshy keme ekıpajynyń uzaq ýaqyt teńizde júrýine jáne borttaǵy jaǵdaıǵa qatysty alańdaýshylyqty joqqa shyǵardy, dep habarlaıdy Al Jazeera.
Juma kúni jýrnalısterge bergen suhbatynda Tramp kemedegi áskerı qyzmetshilerdiń otbasylary jaqyndarynyń jaǵdaıyna alańdap otyr degen aqparatty joqqa shyǵardy.
— Joq, olar alańdap otyrǵan joq, — dedi Tramp.
Ushaq tasymaldaıtyn kemeniń tym uzaq ýaqyt boıy saparda júrgeni týraly suraqqa:
— Joq. Bul ýaqyt áli jetkiliksiz, — dep jaýap berdi AQSh prezıdenti.
Tramptyń bul málimdemesi osy aptada USS Abraham Lincoln bortyndaǵy jabdyqtaý máseleleri men ekıpajdyń psıhologııalyq kúızelisi týraly birqatar materıaldar jarııalanǵannan keıin aıtyldy. Olardyń arasynda áskerı qyzmetshilerdiń kemeden sekirýge áreket jasaǵany týraly málimetter de bar.
Keme qarasha aıynda Kalıfornııa shtatyndaǵy San-Dıego áskerı-teńiz bazasynan shyǵyp, sodan beri qańtarda Venesýelaǵa qarsy júrgizilgen áskerı operatsııaǵa, keıin Iranǵa qarsy soǵys qımyldaryna qatysty.
Bastapqyda kemeniń sapary mamyr aıynda aıaqtalady dep josparlanǵan. Alaıda onyń merzimi uzartyldy. USS Abraham Lincoln portqa kirmesten teńizde 250 kúnnen astam ýaqyt bolyp, AQSh Áskerı-teńiz kúshteriniń rekordyn jańartqan. Kemede 5 myńnan astam teńizshi men teńiz jaıaý áskeri bar.
Birneshe amerıkalyq zań shyǵarýshy kemedegi jaǵdaıǵa qatysty tergeý júrgizýge shaqyrdy. Demokrat senator Rýben Galego Áskerı-teńiz kúshteriniń basshylyǵyna eki partııa ókilderinen quralǵan delegatsııanyń kemege baryp, jaǵdaıdy baǵalaýyna ruqsat berýdi usyndy.
Alaıda Tramp ákimshiligi USS Abraham Lincoln bortyndaǵy jaǵdaıdyń nasharlaǵanyn birneshe ret joqqa shyǵardy.
Juma kúni amerıkalyq bılik ókili Al Jazeera-ǵa Áskerı-teńiz kúshteri kemede sýıtsıd týraly oılardyń nemese ózine qol jumsaýǵa áreket jasaǵandardyń sany artqanyn tirkemegenin málimdedi.
Onyń aıtýynsha, kemede bes dinı qyzmetker, bir psıholog, bir áleýmettik qyzmetker, minez-qulyq densaýlyǵy boıynsha úsh maman jáne keshendi aldyn alý jónindegi bir keńesshi jumys isteıdi. Sondaı-aq kemede áskerı qyzmetshilerge emotsııalyq qoldaý kórsetetin ıt bar.
Tramp kemeniń uzaq ýaqyt teńizde júrýine qatysty alańdaýshylyqty joqqa shyǵarǵanymen, USS Abraham Lincoln jaqyn arada basqa kememen aýystyrylatynyn rastady.
— Bul keme qazir nemese jaqyn arada keri qaıtady. Onyń ornyna dál sondaı basqa keme keledi, — dedi Tramp.
Osy aptada demokrat senator Rıchard Blıýmental AQSh qorǵanys mınıstri Pıt Hegsetke hat joldap, kemedegi jaǵdaı týraly aqparat surady. Ol, sonyń ishinde, Áskerı-teńiz kúshteri ekıpajdyń psıhologııalyq jaǵdaıyn baǵalaý úshin qandaı kórsetkishterdi paıdalanatynyn bilgisi keletinin aıtty.
Senator sondaı-aq USS Abraham Lincoln kemeniń Iranǵa qatysty mıssııasy qandaı áskerı maqsatty kózdeıtinin jáne osy maqsatqa jetý úshin onyń ári qaraı aımaqta bolýy qajet pe degen suraq qoıdy.
AQSh pen Izraıl bastaǵan Iranǵa qarsy soǵys 28 aqpanda bastalǵan. Maýsym aıynda AQSh pen Iran áskerı qımyldardy dereý toqtatýdy kózdeıtin ózara túsinistik týraly memorandýmǵa qol qoıǵan. Alaıda ótken aıda Ormýz buǵazyna qatysty kelispeýshilikten keıin kelisim júzege aspaı qaldy.
Odan keıingi shıelenis AQSh-tyń Iran porttaryna áskerı-teńiz blokadasyn qaıta engizýine, al Irannyń buǵaz arqyly qatynasty shekteýine ákeldi.
Sodan beri Iran munaı, tabıǵı gaz, tyńaıtqysh jáne basqa da taýarlardy tasymaldaýda mańyzdy ról atqaratyn Ormýz buǵazy arqyly keme qatynasyn retteý jóninde Omanmen kelisimge kelýge dıplomatııalyq kúsh salyp jatyr.
Aıta keteıik, Ormýz buǵazynda ADNOC kompanııasynyń eki kemesine shabýyl jasaldy.
