Tramp kelissózder nátıjeli bolsa, Iranǵa soqqy jasamaıtynyn málimdedi
ASTANA. KAZINFORM — Iran tóńiregindegi qaqtyǵysty retteý máselesi ázirge sheshimin tappaı otyr. Buǵan dıplomatııalyq kelissózderge qaramastan, Ormýz buǵazyndaǵy shıelenistiń báseńdemeýi sebep, dep habarlaıdy Kazinform agenttiginiń Taıaý Shyǵystaǵy menshikti tilshisi.
AQSh prezıdenti Donald Tramp Tegerannyń ıadrolyq baǵdarlamasy men Ormýz buǵazyn ashý jónindegi kelissózder nátıjeli bolsa, AQSh-tyń Iranǵa qaıta soqqy jasaýy ekitalaı ekenin málimdedi.
AQSh basshysy bul týraly 8 qarashada CNN telearnasyna telefon arqyly bergen 20 mınýttyq suhbatynda aıtty.
— Bári olardyń naqty ári berik kelisimge kelýine baılanysty. Mundaı jaǵdaıda qaıta soqqy jasaýǵa týra kelmeıdi dep oılaımyn, — dedi AQSh prezıdenti.
Sonymen qatar Tramp AQSh áskeri jańa áskerı operatsııalardy bastaýǵa daıyn ekenin aıtty. Onyń sózinshe, aımaqtaǵy úsh amerıkalyq áýe kemesi kez kelgen ýaqytta operatsııa júrgizýge ázir tur.
AQSh prezıdentiniń sózinshe, Vashıngton Irannyń elektr stantsııalary men 38 kópirin qosa alǵanda, soqqy jasalýy múmkin nysandardy belgilep qoıǵan. Onyń málimdeýinshe, amerıkalyq ásker bul nysandardy bir saǵat ishinde joıa alady.
— Men mundaı qadamǵa barǵym kelmeıdi. Óıtkeni ınfraqurylymdy qaıta qalpyna keltirýge shamamen on jyl ýaqyt qajet bolady, — dedi Tramp.
Tramp buǵan deıingi soqqylardan keıin Irannyń áskerı áleýeti aıtarlyqtaı álsiregenin de málimdedi. Onyń baǵalaýynsha, Tegeranda zymyrandardyń shamamen 10 paıyzy, al drondardyń 15 paıyzy qalǵan.
Buǵan qosa AQSh-tyń Memlekettik hatshysy Marko Rýbıo jeksenbi kúni kelissózderdiń nátıjesine qatysty saqtyq tanytyp, taraptardyń ázirge dıplomatııalyq kelisimge qol jetkizýine ýaqyt kerek ekenin aıtty.
— Kelissózderde ázirge aıtarlyqtaı nátıje joq. Irannyń talaptary qabyldaýǵa kelmeıdi, keıbiri tipti shyndyqqa janaspaıdy, — dedi AQSh Memlekettik hatshysy.
CNN dereginshe, ótken aptada AQSh Kongresine ótken aralyq saılaýdan keıin Taıaý Shyǵystaǵy dıplomatııalyq baılanystar jandana túsken. Atap aıtqanda, 6 qarashada Donald Tramp Qatar ámiri sheıh Tamım ben Hamad Ál Tánımen telefon arqyly sóılesip, qaqtyǵysty báseńdetý joldaryn talqylady.
Qatar Vashıngton men Tegeran arasyndaǵy kelissózderde deldaldyq qyzmetin jalǵastyryp keledi. Alaıda taraptar ázirge kelissózderdiń naqty nátıjesi týraly aqparat bergen joq.
Aıta keteıik, AQSh, Izraıl jáne Iran arasyndaǵy qarýly qaqtyǵys 2026 jylǵy aqpannyń sońynan beri jalǵasyp keledi. Qaqtyǵysty retteýdegi basty kedergilerdiń biri – álemdik munaı jetkiziliminiń edáýir bóligi ótetin Ormýz buǵazyndaǵy jaǵdaı.
Buǵan deıin AQSh Iranǵa Kaspıı teńizi men qurlyqtaǵy shekara arqyly qarý jetkizýge tosqaýyl qoımaqshy ekenin habarlaǵan bolatynbyz.
