Tramp: kelissóz barysynda barlyq sheshimderdi Pýtın men Zelenskıı qabyldaıdy

ASTANA. KAZINFORM – Qyrymnyń Ýkraınaǵa qaıtarylýy, al Ýkraınanyń NATO-ǵa kirýi múmkin emes. Bul týraly Fox News telearnasyna suhbaty barysynda AQSh prezıdenti Donald Tramp málim etti.

Tramptyń túsindirýinshe, Ýkraınanyń qaýipsizdigine NATO kepil bola almaıdy. Alaıda AQSh Eýropaǵa kómektesýge daıyn.

- Qaýipsizdik týraly aıtar bolsaq, olar oqıǵa ornyna adamdardy jiberýge ázir. Biz olarǵa kómektesýge daıynbyz, ásirese áńgime áýe qaýipsizdigi týraly bolyp otyrsa. Óıtkeni bizde bar nárse eshkimde joq. Menińshe, bul jerde eshqandaı problema joq. Degenmen qandaı da bir qaýipsizdik reformasy bolady. Alaıda bul NATO emes, dep málimdedi Aq úı ıesi.

Tramp suhbat barysynda óziniń prezıdent laýazymynda otyrǵan kezinde amerıka áskeri Ýkraınada bolmaıtynyn aıtty. Alaıda onyń sózinshe, Frantsııa men Germanııa shıelenis aıaqtalǵan soń, onda ózderiniń áskerin ornalastyrýdy kózdep otyr.

- Eýropalyq memleketter aldyńǵy shepke shyǵady, olardyń arasynda Frantsııa men Germanııa bar jáne Ulybrıtanııadan da bolady. Olar óz áskerlerin ornalastyrǵylary keledi, menińshe bul sonshalyqty qıyn is emes ,- dedi Tramp.

Zelenskıı men Pýtınniń eki aptadan soń bolatyn kezdesýi týraly jańa aqparat bar ma, degen saýalǵa Tramp eki el kóshbasshylaryna ekijaqty kezdesý ótkizý kerektigi týraly aıtty.

Onyń sózinshe, reseı-ýkraına daǵdarysy boıynsha barlyq sheshimdi Vladımır Pýtın men Vladımır Zelenskıı qabyldaıdy, sebebi AQSh áskerı áreketter júrip jatqan jerden tym alysta.

- Men olar keremet dos bolyp ketedi dep oılamaımyn, degenmen olar durys istep jatyr, al biz tek syrttan baqylap turamyz, - dedi prezıdent.

Osyǵan deıin Reseıdiń Syrtqy ister mınıstri Sergeı Lavrov AQSh prezıdentine shaqyrtý joldaǵany týraly aıtty.