Tramp kelissózder aıasynda Iranǵa soqqy berýdi ýaqytsha toqtatty
ASTANA. KAZINFORM — Iran ınfraqurylymyna jasalýy múmkin soqqylardy ýaqytsha toqtatý týraly sheshim Vashıngton men Tegeran arasyndaǵy «ónimdi kelissózder» týraly málimdemelerden keıin qabyldandy, dep habarlaıdy Kazinform agenttiginiń menshikti tilshisi.
AQSh prezıdenti Donald Tramp sońǵy eki kún ishinde AQSh pen Iran arasynda Taıaý Shyǵystaǵy qaqtyǵysty «tolyq ári túpkilikti retteýge» baǵyttalǵan «óte jaqsy jáne nátıjeli kelissózder» ótkenin málimdedi.
Bul týraly ol Truth Social jelisindegi paraqshasynda jazdy.
— Rapid Response 47 (@RapidResponse47) March 23, 2026
Onyń aıtýynsha, osy kelissózderdiń mazmuny men sıpatyn eskere otyryp, Irannyń energetıkalyq nysandaryna áskerı soqqy jasaýdy bes kúnge keıinge qaldyrý týraly tapsyrma bergen.
— AQSh pen Iran Taıaý Shyǵystaǵy qaqtyǵysty tolyq ári túpkilikti retteý boıynsha óte jaqsy ári nátıjeli kelissózder júrgizdi. Osy tereń, mazmundy jáne syndarly dıalogtyń sıpatyn eskere otyryp, ári kelissózder aldaǵy aptada jalǵasatynyn nazarǵa alyp, men Irandaǵy elektr stantsııalary men energetıkalyq ınfraqurylymǵa soqqy jasaýdy bes kúnge keıinge qaldyrýdy tapsyrdym, — dedi D. Tramp.
Al Iran buqaralyq aqparat quraldary Tramppen tikeleı de, janama da baılanys bolmaǵanyn aıtyp, onyń «shegingenin» málimdedi.
Irannyń Fars aqparat agenttigi belgisiz derekkózge silteme jasap, AQSh prezıdentimen «deldaldar arqyly da» eshqandaı baılanys bolmaǵanyn habarlady.
Aıta keteıik, Iran bıligi ázirge Tramptyń málimdemesine resmı túrde pikir bildirgen joq.
Buǵan deıin Aq úı basshysy Tegeranǵa ýltımatým qoıyp, 48 saǵat ishinde Ormýz buǵazyn ashýdy talap etken edi. Áıtpese, Irannyń energetıkalyq ınfraqurylymyn «joıyp jiberemiz» dep qorqytqan.
Óz kezeginde Iran Ormýz buǵazyn tolyq jabatynyn, Izraıldiń energetıkalyq jáne IT ınfraqurylymyna, sondaı-aq AQSh bazalary ornalasqan elderdegi elektr stantsııalaryna soqqy jasaıtynyn eskertken.
