Tramp qazan aıynyń sońynda bıznesmendermen birge Qytaıǵa barýy múmkin

VAShINGTON. KAZINFORM – AQSh Prezıdenti Donald Tramp osy kúzde amerıkalyq kompanııa basshylarymen birge Qytaıǵa saparmen barýy múmkin. Bul týraly Bloomberg agenttigi derekkózderge silteme jasap málimdedi, dep jazady TASS.

Amerıkalyq ákimshilik ókilderi keıbir kompanııa jetekshilerine habarlasyp, 2025 jyly Aq úı basshysyn Qytaı Halyq Respýblıkasyna yqtımal saparynda birge júrýge múddeli me, joq pa – sony anyqtaýǵa tyrysqan.

Qarastyrylyp jatqan yqtımal merzimderdiń biri — qazan aıynyń sońy. Bul kezde Ońtústik Koreıada Azııa-Tynyq muhıty ekonomıkalyq yntymaqtastyǵy sammıti, al Malaızııada Ońtústik-Shyǵys Azııa elderi qaýymdastyǵynyń joǵary deńgeıdegi kezdesýi ótedi. AQSh Prezıdenti ádette osy eki is-sharaǵa da qatysady.

Tramp alǵashqy sheteldik saparyn Parsy shyǵanaǵyndaǵy elderge jasaǵan bolatyn. Ol saparǵa qarjy, tehnologııa jáne óndiris salalaryndaǵy jetekshi kompanııalardyń basshylaryn ertip barǵan. Sol kezde Prezıdent energetıka, jasandy ıntellekt, chıpter, aeroǵarysh ónerkásibi jáne basqa da salalardy qamtıtyn mıllıardtaǵan dollarlyq jańa kelisimderge qol jetkizgenin jarııalap, AQSh-tyń korporatıvtik qýatyn pash etken.

Bul jaǵdaıǵa baılanysty pikir bildirýdi suraǵanda, AQSh ákimshiliginiń baspasóz hatshysy Kerolaın Lıvıtt Qytaıǵa sapar qazirgi ýaqytta josparlanyp otyrmaǵanyn aıtty. Saýda mınıstrligi bul máselege qatysty túsinikteme berýden bas tartty.

Aıta keteıik, Buǵan deıin AQSh Kongresiniń Ókilder palatasy Tramptyń salyqty azaıtý týraly zań jobasyn maquldaǵanyn jazdyq.