Tramp Qazaqstannan keletin ımportqa 25% kedendik baj salyǵyn engizetinin málimdedi

ASTANA. KAZINFORM — Donald Tramp Truth Social áleýmettik jelisinde Qazaqstan Prezıdenti Qasym-Jomart Toqaevqa joldaǵan hatty jarııalap, AQSh-tyń 1 tamyzdan bastap Qazaqstannan keletin barlyq ımportqa 25 paıyzdyq kedendik baj salyǵyn engizetinin habarlady.

Truth Social jelisinde jarııalanǵan hatta Tramp Qazaqstanmen aradaǵy saýda qatynastarynyń mańyzdylyǵyna toqtalyp, saýda balansynyń tapshylyǵyna qaramastan, yntymaqtastyqqa daıyn ekenin aıtady.

— Biz Qazaqstanmen aradaǵy saýda qatynastaryn birneshe jyldan beri talqylap kelemiz jáne Qazaqstannyń tarıftik, tarıftik emes saıasaty men saýda tosqaýyldaryna baılanysty uzaq merzimdi ári turaqty saýda tapshylyǵynan bas tartýymyz qajet degen qorytyndyǵa keldik. Ókinishke qaraı, qazirgi qarym-qatynasymyz ózara tıimdi dep aıtýǵa kelmeıdi. 2025 jyldyń 1 tamyzynan bastap AQSh-qa Qazaqstannan keletin barlyq taýarǵa 25% mólsherinde kedendik baj salyǵy salynady. Bul – salalyq tarıfterden bólek, — dep jazdy Tramp óz paraqshasynda.

Ol sondaı-aq, eger qazaqstandyq kompanııalar óndiristi AQSh aýmaǵynda ornalastyrsa, eshqandaı baj salyǵy qoldanylmaıtynyn atap ótti.

Uqsas mazmundaǵy hatty AQSh-qa ımport jetkizetin taǵy alty eldiń basshylary da alǵan.

Aıta ketseke, Aq úı AQSh prezıdenti Donald Tramptyń bolat pen alıýmınııge salynatyn baj salyǵyn 25%-dan 50%-ǵa deıin arttyrý týraly Jarlyqqa qol qoıǵanyn habarlaǵan bolatyn.