Tramp Qazaqstanǵa kelýi múmkin

ASTANA.KAZINFORM — «Ortalyq Azııa – AQSh» sammıti kezinde jýrnalıster Donald Trampqa Qazaqstanmen yntymaqtastyqqa qatysty birqatar suraq qoıdy. Bul týraly Aqorda habarlady.

— Qazaqstan men AQSh jalpy quny 17 mıllıard dollardy quraıtyn kelisimder jasady. Ol avıatsııa, mıneraldy resýrstar jáne tsıfrlyq tehnologııalar sekildi baǵyttardy qamtıdy. Sizdiń oıyńyzsha, bul seriktestiktiń qaı salasy mańyzdy? Ekinshi suraq. Tramp myrza, Sizdi Qazaqstanǵa kelgen alǵashqy AQSh Prezıdenti dep qashan aıta alamyz? Bizdiń elge qonaq bolý josparyńyzda bar ma? – degen suraq qoıdy jýrnalıst.

AQSh Prezıdenti Donald Tramp Qazaqstanmen seriktestiktiń barlyq salasy mańyzdy ekenin aıtty. Sonymen qatar Qazaqstanǵa kelýi múmkin ekenin jetkizdi.

– Bul ábden múmkin (Qazaqstanǵa saparmen kelý – red). Barlyq sala óte mańyzdy dep sanaımyn. Bir jyldan keıin ne bolatynyn bilmeımiz. Sizdiń tabıǵı resýrsqa baı elińiz, sondaı-aq parasatty Prezıdentińiz bar, - dep jaýap berdi AQSh Prezıdenti Donald Tramp.

Aıta keteıik, Qasym-Jomart Toqaev Aq úıde tarıhı kezdesý uıymdastyrǵany úshin AQSh Prezıdentine alǵys aıtyp, S5+1 formatyndaǵy sammıt shyn máninde Ortalyq Azııa men Qurama Shtattar arasyndaǵy yntymaqtastyqtyń jańa kezeńine jol ashqanyna nazar aýdardy.