Tramp Qatarda qandaı kelisimder jasady

ASTANA. KAZINFORM — Birlesken málimdeme barysynda Qatar ámiri Tamım ıbn Hamad Ál Tanı ótken kelissózdi mándi dep atap, taraptar kóptegen máseleni, sonyń ishinde Taıaý Shyǵystaǵy jaǵdaıdy talqylaı alǵanyn aıtty, dep habarlaıdy VVS. 

Ámir Qatar men AQSh arasyndaǵy qarym-qatynas endi jańa deńgeıge shyǵady degen úmitin bildirdi. 

Donald Tramp óz kezeginde «bul bir-eki saǵat ýaqyt qyzyq ótkenin» jáne áńgimelesýshiler «búkil álemdi, sonyń ishinde Reseı, Ýkraına jáne Irandy talqylaǵanyn» málimdedi. 

Tramptyń Qatar bıligimen kezdesýi onyń seısenbide bir jarym kún ótkizgen Saýd Arabııasyna saparymen salystyrǵanda áldeqaıda qysqa boldy.

Donald Tramptyń Taıaý Shyǵysqa saparynyń birinshi kúninde AQSh pen Saýd Arabııasy qorǵanys salasynda 142 mlrd dollarlyq kelisimge qol qoıdy. AQSh pen Qatar qol qoıǵan qujattardyń ishinde qorǵanys salasyndaǵy ózara túsinistik týraly kelisim men eki el arasyndaǵy yntymaqtastyq týraly deklaratsııa bar.

Sonymen qatar, amerıkalyq tarap Qatar Airways quny 200 mlrd dollardan asatyn 160 Boeing ushaǵyna «rekordtyq» tapsyrys jáne ushqyshsyz basqarylatyn MQ-9B ushaqtaryna tapsyrys bergenin habarlady.

Qujattarǵa qol qoıý rásimine sondaı-aq AQSh Qorǵanys mınıstri Pıt Hegset, Qarjy mınıstri Skott Bessent, Saýda mınıstri Govard Lıýtnık jáne Aq úıdiń baspasóz hatshysy Karolın Levıtt qatysty. 

Aq úıdiń Qatarda kelissóz ótken kúniniń qorytyndylary boıynsha jarııalanǵan baspasóz habarlamasynda qol qoıylǵan kelisimder elder arasyndaǵy ekonomıkalyq almasý keminde 1,2 trln dollardy quraıtynyn, jasasqan mámileler kólemi 243 mlrd dollardan asatyny aıtylǵan.

Buǵan deıin Tramp Er-Rııadta Sırııa prezıdentimen kezdesti. 

Aq úı Qatar koroldik otbasymen Boeing 747 lıýks ushaǵyn prezıdenttik bort (Air Force One) retinde paıdalaný úshin AQSh-qa berý týraly kelissóz júrgizdi.