Tramp Qarjy jáne Saýda mınıstrleriniń úgitteýlerinen keıin tarıfterdi ýaqytsha toqtatty

ASTANA. KAZINFORM –  AQSh prezıdenti Donald Tramp Qarjy mınıstri Skott Bessentpen jáne Saýda mınıstri Govard Lıýtnıktpen áńgimeleskennen keıin ekonomıkalyq baj salyǵyn engizýdi ýaqytsha toqtatty. Bul týraly TASS habarlady. 

WSJ deregi boıynsha, mınıstrlikterdiń basshylary Trampty agressıvti tarıftik jospardy toqtatýǵa kóndirgen. Alaıda AQSh prezıdentiniń saýda jónindegi keńesshisi Pıter Navarro baj salyǵyn saqtap qalýdy talap etken. Bessent pen Lıýtnıkpen áńgimeden keıin Tramp Truth Social áleýmettik jelisindegi paraqshasynda keıbir tarıfterdiń kúshin ýaqytsha toqtatý týraly sheshim qabyldaǵanyn jarııalaǵan.

Gazettiń málimetinshe, 2 sáýirde Tramp engizgen birneshe saýda tarıfi kúshine engennen keıin qor naryqtary kúrt quldyraǵan. Bul Aq úıde qatty alańdaýshylyq týǵyzdy.

Sonymen qatar, Tramptyń saýda keńesshisi Navarro AQSh prezıdenti men mınıstrlikter basshylary arasyndaǵy áńgimeni bilmegeni de habarlandy.

9 sáýirde Tramp kelissózder júrgizýge daıyndyq bildirgen elderge qatysty baj salyǵyn arttyrýdy 90 kúnge toqtatatynyn málimdedi. Bul elder úshin ımporttyq tarıf mólsheri 10% deńgeıinde saqtalady. Bessenttiń aıtýynsha, bul toqtatý Kanada men Meksıkaǵa da qatysty.

Sonymen qatar, AQSh prezıdenti Qytaıdan keletin ónimderge arnalǵan tarıfterdi 125%-ǵa deıin kóterdi.

Aıta ketelik AQSh Prezıdenti Donald Tramp Qytaı AQSh taýarlaryna salynǵan 34% baj salyǵyn alyp tastamasa, 9 sáýirden bastap Qytaıdan ákelinetin ónimderge 50% qosymsha baj salyǵyn engizetinin málimdedi.