Tramp Kanadanyń AQSh quramyna qosylatynyna senimdi
ASTANA. KAZINFORM — AQSh prezıdenti Donald Tramp bolashaqta Kanadanyń AQSh quramyna kiretinine senimdi ekenin málimdedi, dep habarlaıdy TASS.
Amerıka kóshbasshysy bul týraly AQSh Kongresine aralyq saılaý qarsańynda Arızona shtatynda Respýblıkalyq partııa jaqtastarynyń aldynda sóılegen sózinde aıtty.
— Aqyr sońynda olar AQSh-tyń 51-shtatyna aınalady. Basqasha bolýy múmkin emes. Olar bizge kerek emes, biz olarǵa kerekpiz, — dedi ol.
Onyń sózinshe, buǵan deıin AQSh Kanadamen aradaǵy saýda-ekonomıkalyq baılanystar saldarynan jyl saıyn 100 mıllıard dollarǵa deıin shyǵynǵa ushyraǵan.
Tramp Kanada bıligi «Grenlandııanyń jolyn qaıtalaıdy» dep esepteıdi. Qyrkúıekte AQSh prezıdenti Danııa premer-mınıstri Mette Frederıksen jáne Grenlandııa úkimetiniń basshysy Iens-Frederık Nılsenmen birge Arktıkadaǵy araldyń qaýipsizdigin qamtamasyz etý mindetterin Vashıngtonǵa berý jónindegi kelisimge qol qoıǵan.
Tramp buǵan deıin de Kanadany AQSh quramyna qosylýǵa birneshe ret shaqyrǵan. Ol Kanada premer-mınıstri Mark Karnıdi de birneshe márte «gýbernator» dep ataǵan.
Alaıda Kanada bıligi eldiń AQSh quramyna qosylýy múmkin ekenin joqqa shyǵardy. Qyrkúıek aıynyń sońynda Karnı The New York Times gazetine bergen suhbatynda Kanada bıligi sońǵy bir jylda AQSh tarapynan bolýy yqtımal áskerı basyp kirý jaǵdaıyna daıyndalǵanyn aıtqan. Degenmen ol mundaı jaǵdaıdyń oryn alý yqtımaldyǵy tómen dep esepteıtinin jetkizgen.
Aıta keteıik, Tramp Atlant nemese Tynyq muhıtyn óz atymen ataýdy usyndy.
Buǵan deıin ol AQSh-qa Kanadanyń hokkeı taıaǵy men qorǵanysh maskasy qajet emes ekenin aıtqan bolatyn.
