Tramp Kanadany ushaqtarǵa 50% tarıf salamyn dep qorqytyp jatyr

ASTANA. KAZINFORM – AQSh prezıdenti Donald Tramp Ottavaǵa amerıkalyq ushaqtardy sertıfıkattaýdan bas tartqany úshin jaýap retinde barlyq kanadalyq ushaqqa 50% baj salýmen qorqytty, dep habarlaıdy CBS News. 

- Kanada buryn-sońdy jasalǵan eń keremet jáne tehnologııalyq turǵydan eń ozyq ushaqtar qataryna jatatyn Gulfstream 500, 600, 700 jáne 800 reaktıvti ushaqtaryn sertıfıkattaýdan negizsiz jáne tabandy túrde bas tartty. Osy arqyly biz Bombardier Global Express jáne Kanadada shyǵarylǵan barlyq ushaqty sertıfıkattaý kúshin joıamyz, - dep jazdy Donald Tramp Truth Social-da. 

Tramp kóńili qalǵanyn bildirip, «Kanada dál osyndaı sertıfıkattaý protsesi arqyly Kanadada Gulfstream ónimderin satýǵa is júzinde tyıym salyp otyr» dedi.

- Eger qandaı da bir sebeptermen bul jaǵdaı dereý túzetilmese, men Amerıka Qurama Shtattaryna satylatyn barlyq ushaqqa 50% tarıf engizýdi josparlap otyrmyn», - dep qorqytty Donald Tramp. 

Gulfstream Aerospace – Djordjııa shtatynyń Savanna qalasynda ornalasqan amerıkalyq kompanııa. Tramp amerıkalyq ushaq óndirýshisiniń múddelerin qorǵaý úshin Kanadanyń eń iri ushaq óndirýshisi, Kvebekte ornalasqan Bombardier kompanııasyna joǵary baj salyǵyn engizýge daıyn.

Osyǵan deıin Tramp Kýbaǵa munaı jetkizetin elderdiń taýarlaryna baj salyǵyn engizetinin habarlaǵan bolatynbyz.