Tramp kanadalyq bolat pen alıýmınııge baj salyǵyn 50%-ǵa deıin kóteredi

ASTANA. KAZINFORM — AQSh prezıdenti Donald Tramp Saýda mınıstrine Kanadadan ımporttalatyn bolat pen alıýmınııge 50 paıyzǵa deıin qosymsha baj salyǵyn engizýdi tapsyrǵanyn jarııalady, dep habarlaıdy Euronews. 

Seısenbide AQSh prezıdenti Donald Tramp kanadalyq bolat pen alıýmınııge josparlanǵan tarıfterdi eki eselep, olardy 50%-ǵa deıin kóterý josparyn jarııalady.

Truth Social áleýmettik jelisindegi jazbasynda ol tarıfter sársenbi, 12 naýryzda kúshine enetinin jazdy. Onyń aıtýynsha, bul Kanadanyń elektr energııasyna ornatqan 25 paıyzdyq tarıfine jaýap.

— Men Saýda mınıstrime álemdegi eń joǵary tarıftik elderdiń biri Kanadadan Qurama Shtattarǵa keletin barlyq bolat pen alıýmınııge 50%-ǵa deıin QOSYMShA 25% baj salyǵyn engizýdi tapsyrdym, — dep jazdy Tramp.

Ol sondaı-aq Kanada bıliginen amerıkalyq sút ónimderine baj salyǵyn dereý tómendetýdi talap etti.

— Eger Kanada basqa da soraqy jáne burynnan kele jatqan tarıfterdi joımasa, 2 sáýirde men AQSh-qa ákelinetin avtomobılderge tarıfterdi aıtarlyqtaı kóteremin, bul kanadalyq avtokólik óndirisin túbegeıli toqtatady, — dep qorqytty Tramp.

Keıinirek AQSh prezıdentiniń saýda jónindegi keńesshisi Pıter Navarro kanadalyq bolat pen alıýmınıı ımportyna josparlanǵan tarıfterdi 50 paıyzǵa deıin kóterý osy aptada kúshine enbeıtinin málimdedi, dep jazdy Interfaks. 

— Durys, — dep jaýap berdi ol CNBC News tilshisiniń Kanadaǵa tarıfterdi kóterý keshiktirilip jatqany týraly saýalyna.

Ontarıo provıntsııasynyń premer-mınıstri Dag Ford AQSh Saýda mınıstrimen sóıleskennen keıin AQSh-qa elektr energııasyn eksporttaýǵa 25% qosymsha aqy engizý josparyn toqtatýǵa kelisti.

Eske sala ketsek, 8 naýryz kúni Qytaı úkimeti Kanadadan ákelinetin birqatar ónimge qosymsha baj salyǵy engiziletinin jarııalady. 

Buǵan deıin Tramptyń Kanadadan, Meksıkadan, Qytaıdan ımporttalatyn jańa tarıfteri kúshine engenin jazǵan bolatynbyz.