Tramp Kanadadan ımporttalatyn birqatar taýarǵa 50 paıyzdyq baj salyǵyn engizdi
ASTANA. KAZINFORM — AQSh prezıdenti Donald Tramp Kanadadan ımporttalatyn birqatar taýarǵa qosymsha 50 paıyzdyq baj salyǵyn engizý týraly jarlyqqa qol qoıdy. Bul týraly BBC habarlady.
Jarlyqta Kanadanyń keıbir memlekettermen saýdada AQSh-pen salystyrǵanda anaǵurlym qolaıly jaǵdaı jasap, negizsiz shekteýler qoldanatyny aıtylǵan.
— Kanada keıbir sheteldik eldermen saýdada AQSh-pen salystyrǵanda anaǵurlym tıimdi sharttar usynyp, kemsitýshilik sıpattaǵy ári negizsiz shekteýler engizip otyr, — delingen qujatta.
Buǵan deıin Donald Tramp Kanadanyń amerıkalyq sút ónimderine qatysty kóp jyldan beri qoldanyp kele jatqan tarıfterin «múlde qabyldaýǵa bolmaıtyn saıasat» dep ataǵan edi.
Jańa baj salyǵy 19 tamyzdan bastap kúshine enedi. Sarapshylardyń pikirinshe, bul sheshim AQSh pen Kanada arasyndaǵy saýda teketiresin odan ári ýshyqtyrýy múmkin.
Aq úı jańa tarıfter amerıkalyq óndirýshiler men bıznestiń múddesin qorǵaý úshin engizilip otyrǵanyn málimdedi.
Jańa shekteýler kúndelikti tutyný taýarlarynan bastap ónerkásiptik ónimderge deıingi keń aýqymdy qamtıdy. Atap aıtqanda, sharap, hokkeı taıaqshalary men tsementke baj salyǵy salynady. Al energııa resýrstary, kalıı tyńaıtqyshtary, strategııalyq mańyzy bar mıneraldar jáne balyq ónimderi jańa tarıften bosatylady.
Sonymen qatar AQSh Kanadadan ákelinetin bolat, alıýmınıı jáne mysqa burynnan qoldanystaǵy 15-50 paıyzdyq tarıfterdi saqtap qaldy.
Budan bólek, kanadalyq qylqanjapyraqty aǵash materıaldaryna 35 paıyzdyq, al AQSh-ta óndirilmegen avtokólik bólshekterine 25 paıyzdyq tarıf kúshinde qalady.
Óz kezeginde Kanada da AQSh-tan ımporttalatyn bolatqa, alıýmınııge jáne avtokólikterge 25 paıyzdyq ótemaqy baj salyǵyn qoldanyp keledi.
Eske salaıyq, buǵan deıin AQSh prezıdenti Donald Tramp amerıkalyq tsıfrlyq qyzmetterge salyq engizetin kez kelgen eldiń AQSh-qa eksporttaıtyn barlyq taýaryna 100 paıyzdyq kedendik baj salyǵy salynatynyn málimdegen edi.
