Tramp Kanadadan ákelinetin kólikke 50 paıyzdyq baj salyǵyn engizbek
ASTANA. KAZINFORM — Donald Tramp Kanadadan ımporttalatyn kólik pen qosalqy bólshekterge baj salyǵyn 50 paıyzǵa deıin kóteretinin málimdedi, dep jazady Anadoly.
AQSh prezıdenti Donald Tramp kelesi jyldan bastap Kanadadan ımporttalatyn jeńil jáne júk kólikterine, avtokólik bólshekteri men bolatqa salynatyn kedendik baj salyǵy 50 paıyzǵa deıin kóteriletinin aıtty.
Tramp bul týraly áleýmettik jelidegi paraqshasynda jazdy.
Prezıdent óz jazbasynda Kanadanyń birneshe jyldan beri AQSh-ty «aldap kelgenin» aıtyp, eki el arasyndaǵy saýda balansynyń 60 mlrd dollar kólemindegi tapshylyǵyn qolaısyz dep atady. Onyń aıtýynsha, buǵan endi jol berilmeıdi.
— 2027 jylǵy 1 qańtardan bastap barlyq avtomobılge, júk kólikterine (úlkeni de, kishisi de), avtokólik bólshekteri men bolatqa salynatyn baj salyǵy 50 paıyzǵa deıin kóteriledi. AQSh-ta óndirseńizder — baj salyǵy nól bolady. Kanada endi AQSh-tyń shtaty retinde qarastyrylmaıdy, — dep jazdy Tramp.
Onyń aıtýynsha, Kanada — saýda jáne basqa da salalarda qarym-qatynas jasaý eń qıyn elderdiń biri.
— Olar ózderin artyqshylyqqa ıe el retinde sanaıdy. Alaıda shyn máninde Kanada bizge emes, biz Kanadaǵa qajetpiz. Olardyń saýdasynyń 95 paıyzy AQSh-pen baılanysty, al bizde jaǵdaı kerisinshe, — dedi AQSh prezıdenti.
AQSh pen Kanada saýda kelisimine kele almady. Buǵan sebep — AQSh-tyń Kanadadan ımporttalatyn birqatar taýarǵa 50 paıyzdyq baj salyǵyn engizýi boldy.
Kanada premer-mınıstri Mark Karnı senbi kúni ótken baspasóz máslıhatynda AQSh kelissózder barysynda «ekonomıkalyq turǵydan oryndalmaıtyn ári ádiletsiz» sharttar usynǵanyn aıtty. Sondaı-aq ol jumysshylardy, fermerlerdi, otbasylar men kásipkerlerdi qorǵaý úshin Kanada Vashıngton engizgen jańa tarıfterge tolyq sáıkes keletin jaýap sharalaryn qabyldaıtynyn málimdedi.
Osyǵan deıin 19 tamyzdan bastap Kanadaǵa qatysty jańa baj salyǵy kúshine endi. Jańa shekteýler kúndelikti tutyný taýarlarynan bastap ónerkásiptik ónimderge deıingi keń aýqymdy qamtıdy. Atap aıtqanda, sharap, hokkeı taıaqshalary men tsementke baj salyǵy salynady. Al energııa resýrstary, kalıı tyńaıtqyshtary, strategııalyq mańyzy bar mıneraldar jáne balyq ónimderi jańa tarıften bosatylady.
