Tramp Kanadadaǵy orman órtterine baılanysty jańa baj salyǵyn engizetinin málimdedi
ASTANA. KAZINFORM — AQSh prezıdenti Donald Tramp kanadalyq taýarlarǵa jańa kedendik baj salyǵyn engizetinin aıtty. Ol muny Kanadadaǵy júzdegen orman órti saldarynan qoıý tútin eldiń soltústik óńirlerin basqannan keıin málimdedi, dep habarlaıdy VVS.
Mundaı málimdeme amerıkalyq zań shyǵarýshylardyń orman órtterine qatysty shaǵymdary men Ontarıo premer-mınıstri Dag Fordtyń AQSh-ty shaǵymdanýdyń ornyna órtpen kúreske qoldaý kórsetýge shaqyrǵan úndeýinen keıin jasaldy.
— Amerıka Qurama Shtattarynyń aýasy lastanyp, bylǵandy. Elge densaýlyqqa zııandy aýa kelip jatyr, — dedi Tramp.
Ol Kanadany salǵyrttyqqa qasaqana jol berdi dep aıyptap, osyǵan baılanysty jańa baj salyǵyn engizýi múmkin ekenin aıtty.
Kanadanyń orman órtteri týraly aqparat júıesiniń málimetinshe, elde 888-ge jýyq orman órti tirkelgen. Olardyń basym bóligi áli de baqylaýǵa alynbaǵan. Ontarıo provıntsııasynda 190-nan astam orman órtenip jatyr. Olardyń birqatary da baqylaýdan shyqqan.
Tramp Truth Social áleýmettik jelisindegi jazbasynda Kanada premer-mınıstri Mark Karnıge qońyraý shalyp, eldegi «qasaqana salǵyrttyqqa» qatysty túsinikteme talap etetinin aıtty. Sonymen qatar ol Kanadany orman men butaly alqaptardy tıisinshe «kútip ustamady» dep aıyptady.
Respýblıkalyq partııa ókilderi osy jaǵdaıdy paıdalanyp, Tramptyń Kanadany AQSh-tyń 51-shtatyna aınaldyrý týraly burynǵy usynysyn qaıta kóterdi. Bul málimdeme kanadalyqtardyń narazylyǵyn týǵyzyp, olardyń bir bóligi qarsylyq retinde AQSh-qa saparlaryn toqtatty. Áleýmettik jeli qoldanýshylarynyń keıbiri Ontarıo men Mıchıgandy baılanystyratyn, Kanada qarjylandyryp jatqan halyqaralyq Gordı Haý kópiriniń ashylýyn keıinge qaldyrýdy usyndy.
Kanada bıligi Tramptyń jańa baj salyǵyn engizý týraly málimdemesine ázirge jaýap bergen joq. Alaıda buǵan deıin premer-mınıstr Mark Karnı klımattyń ózgerýimen kúresý eki elge de ortaq mindet ekenin aıtqan.
AQSh pen Kanada arasyndaǵy qarym-qatynas sońǵy bir jylda, negizinen saýda máselelerine baılanysty, birneshe ret shıelenisti. Byltyr Donald Tramp AQSh-pen ondaǵan jyl boıy erkin saýda artyqshylyqtaryn paıdalanyp kelgen Kanada taýarlaryna kedendik baj salyǵyn engizdi. Alaıda eki el áli kúnge deıin jańa saýda kelisimine qol jetkizgen joq.
Aıta keteıik, Donald Tramp NATO sammıtine kelgende Grenlandııa AQSh-tyń baqylaýynda bolýy tıis degen burynǵy málimdemesin taǵy qaıtalady.
