Tramp Kamala Harrıske berilgen qorǵaýdy toqtatty

ASTANA. KAZINFORM — AQSh prezıdenti Donald Tramp burynǵy vıtse-prezıdent Kamala Harrıske Sekret qyzmeti tarapynan berilgen qorǵaýdy alyp tastady, dep habarlaıdy The New York Times. 

Beısenbi kúni Tramp memorandýmǵa qol qoıyp, oǵan sáıkes Harrıske berilgen qorǵaý dúısenbiden bastap toqtatylady.

Ádette Sekret qyzmeti burynǵy vıtse-prezıdentke qyzmetinen ketkennen keıin alty aı boıy qorǵaý beredi. Biraq prezıdent Djo Baıden bul merzimdi taǵy bir jylǵa uzartý týraly jarlyqqa qol qoıǵan bolatyn.

– Vıtse-prezıdent Sekret qyzmetine olardyń kásibıligi, adaldyǵy jáne qaýipsizdikti qamtamasyz etýdegi berik ustanymy úshin alǵys bildiredi, – dedi Harrıstiń aǵa keńesshisi Kırsten Allen.

Hanym Harrıske berilgen qorǵaý onyń el boıynsha jańa prezıdenttik kampanııasyna arnalǵan kitabyn nasıhattaý týryna shyǵar aldynda toqtatyldy. «107 kún» dep atalatyn kitap qyrkúıektiń 23-inde jaryq kórýi tıis.

Tramp qyzmetke kiriskeli beri birqatar tulǵaǵa berilgen qorǵaýdy alyp tastaǵan edi. Atap aıtqanda, burynǵy ulttyq qaýipsizdik jónindegi keńesshi Djon Bolton, burynǵy memlekettik hatshy Maık Pompeo jáne óziniń burynǵy kómekshisi Braıan Hýk qorǵanyssyz qaldy.

Buǵan qosa, naýryz aıynda Tramp Baıdenniń balalary — Hanter men Eshlıdiń de qorǵaýyn alyp tastaǵan bolatyn.