Tramp Kalıfornııa men Florıda jaǵalaýynda munaı óndirý josparyn jarııalady
ASTANA. KAZINFORM — Tramp ákimshiligi Kalıfornııa men Florıda jaǵalaýynda munaı óndirýdiń jańa josparlary týraly jarııalady, bul shtattardyń narazylyǵyn týdyrdy, dep habarlaıdy NBC News.
Ákimshilik jospary Kalıfornııa jaǵalaýyndaǵy alty teńiz ýchaskesin satýdy kózdeıdi. Florıda jaǵalaýynda, shtat jaǵalaýynan keminde 100 mıl qashyqtyqta jańa burǵylaý jumystary da josparlanyp otyr.
Klımattyń ózgerýin «álemde jasalǵan uly aldaý» dep sanaıtyn Donald Tramp Ulttyq energetıkalyq ústemdik keńesin quryp, oǵan AQSh-tyń rekordtyq energııa, ásirese munaı, kómir jáne tabıǵı gaz sııaqty qazba otyndary óndirisin neǵurlym tez arttyrýdy tapsyrdy.
Kalıfornııa gýbernatory, demokrat jáne prezıdenttiń basty synshysy, 2028 jyly prezıdenttikke úmitker bolýdy josparlap otyrǵan Gevın Nıýsom ashyq teńizde burǵylaý ıdeıasy «sátsizdikke ushyraýy múmkin» dep sanaıdy. Bul usynys Florıdada eki partııanyń qarsylyǵyna tap bolýy múmkin.
Synshylardyń pikirinshe, AQSh-ta munaı óndirýdi keńeıtý jobalary jaǵalaýdaǵy qaýymdastyqtar men ekojúıelerge zııan keltirýi múmkin. Týrızm jáne taza jaǵajaılarǵa qoljetimdilik — eki shtat ekonomıkasynyń negizgi quramdas bólikteri.
1995 jyldan bastap Meksıka shyǵanaǵynyń sonyń ishinde Florıda men Alabama sýlaryn qamtıtyn shyǵys bóligindegi federaldy sýlarda munaı tógilý qaýpine baılanysty burǵylaý jumystaryna ruqsat etilmegen. Kalıfornııada teńizdegi birneshe munaı munarasy bar, biraq 1980 jyldardyń ortasynan beri federaldy sýlarda burǵylaýǵa birde de bir jańa ruqsat berilgen joq.
— Munaı tógilýi «qorshaǵan ortaǵa orny tolmas zııan keltirip qana qoımaı, jaǵalaýdaǵy úılerdiń qunyn tómendetedi, týrızm salasyna zııan keltiredi jáne jaǵalaýdaǵy ınfraqurylymdy álsiretedi, — delingen ondaǵan demokrattar qol qoıǵan zań shyǵarýshylar hatynda.
Olardyń baǵalaýynsha, munaıdyń bir ǵana apatty tógilýi salyq tóleýshilerge mıllıardtaǵan dollar shyǵyn, tazalaý jáne ekojúıeni qalpyna keltirý shyǵyndaryn ákelýi múmkin.
Buǵan deıin AQSh prezıdenti Alıaskada munaı men gaz óndirýge ruqsat bergenin jazǵan bolatynbyz.