Tramp JPMorgan Chase bankin sotqa berip, 5 mıllıard dollar talap etti

ASTANA.KAZINFORM - Donald Tramp beısenbi kúni eń iri amerıkalyq bank JPMorgan Chase jáne onyń bas dırektory Djeımı Daımonǵa qarsy 5 mıllıard dollarlyq sot isin qozǵady, dep habarlaıdy NBC News.

Sot isinde Tramptyń bankte saıası sebeptermen zańsyz jabylǵan birneshe shoty bolǵany aıtyldy. 2021 jyldyń 19 aqpanynda, 6 qańtardaǵy Kapıtolııdegi tártipsizdikterden keıin kóp uzamaı bank Trampqa shottar eki aı ishinde jabylatynyn habarlaǵan.

- Meniń júz mıllıondaǵan dollar qolma-qol aqsham boldy, olar maǵan: «Keshirińiz, myrza, biz sizge kómektese almaımyz» dedi», - dep málimdedi Tramp buǵan deıin kabeldi teledıdar arnasyna bergen suhbatynda.

Tramp banktegi aktıvterin 20 kún ishinde alý kerektigin aıtqanyn naqtylady.

- Men oǵan ázildep turǵan shyǵarsyz. Men sizdermen 35, 40 jyl birge jumys istep kelemin dedim, - dedi Donald Tramp.

JPMorgan Chase ókili beısenbi kúni banktiń saıası nemese dinı sebeptermen shottardy jappaıtynyn málimdedi.

- Prezıdent Tramptyń bizdi sotqa bergeni ókinishti árıne, biraq sot isi negizsiz dep sanaımyz, - dedi JPMorgan Chase ókili.

Eldiń eń iri banki JPMorgan Chase basshysy Djeımı Daımon bıznes álemindegi eń yqpaldy adamdardyń biri. Respýblıkashyldar men demokrattar ony jyldar boıy qoldap keledi. 2024 jylǵy saılaý aldynda Tramp Daımonnyń ony qoldaǵanyn málimdegen bolatyn.

Buǵan deıin Donald Tramp VVS-ge qarsy 5 mlrd dollar talap etip, sotqa júgingen bolatyn.