Tramp Izraıldiń Lıvanǵa qarsy shabýylyn toqtatqanyn málimdedi
ASTANA. KAZINFORM – AQSh prezıdenti Donald Tramp Tegerannyń deldaldar arqyly júrgizilip jatqan kelissózderdi toqtatqany týraly málimdemeden keıin jaǵdaıdy báseńdetýge tyrysyp, Truth Social áleýmettik jelisinde Iranmen dıalogtyń «jedel qarqynmen» jalǵasyp jatqanyn jáne Izraıl armııasynyń Lıvanǵa qaraı soqqy berýin toqtatylǵanyn jazdy, dep habarlaıdy Euronews.
AQSh prezıdenti dúısenbi kúni Izraıl premer-mınıstrimen jáne «Hezbolla» shııttik qozǵalysynyń ókilderimen júrgizilgen kelissózderden keıin Izraıl kúshteri «Beırýtqa kirmeıtinin, al alǵa jyljyp bara jatqan bólimshelerdiń keri burylǵanyn» málimdedi.
Truth Social platformasyndaǵy jazbasynda Tramp «Hezbolla» ókilderimen «óte jaqsy áńgime» bolǵanyn aıtty.
– Biz atysty toqtatý týraly kelistik. Izraıl olarǵa shabýyl jasamaıdy, al olar Izraılge shabýyl jasamaıdy, – dep jazdy AQSh prezıdenti.
Tramp sondaı-aq Tegeranmen kelissózderdiń «jyldam qarqynmen» jalǵasyp jatqanyn atap ótti.
Tramptyń bul málimdemeleri Iran Islam revolıýtsııasy saqshylar korpýsynyń yqpalyndaǵy Tasnim aqparat agenttigi Tegeran Izraıldiń Lıvandaǵy aýqymdy áskerı operatsııasynan keıin AQSh-pen beıbit kelisimge qatysty habar almasýdy toqtatýǵa sheshim qabyldaǵanyn habarlaǵannan keıin jarııalandy.
Sondaı-aq jarııalanymda Irannyń Ormýz buǵazyn tolyqtaı jabýǵa jáne áskerı qımyldar aýqymyn keńeıtýge bel baılaǵany aıtylǵan.
Ádettegi rıtorıkasynan ózgeshe túrde sóılegen Tramp Iran málimdemesiniń mańyzyn tómendetýge tyrysty.
– Shynymdy aıtsam, olardyń kelissózderdi toqtatqan-tottatpaǵany maǵan báribir, – dedi ol amerıkalyq buqaralyq aqparat quraldaryna bergen suhbatynda.
Sonymen birge Tramp Iran agenttiginiń málimdemesinen keıin munaı baǵasynyń kúrt óskenine toqtalyp:
– Meniń oıymsha, jaqyn arada munaı baǵasy tas sııaqty quldyraıdy, – dedi.
AQSh prezıdenti beıbit kelissózderdi jalǵastyrý múmkindigin de joqqa shyǵarmady.
– Bul biz baryp, aınalanyń bárine bomba tastaımyz degen sóz emes. Biz qorshaýdy saqtap qalamyz, – dedi ol.
Dál sol ýaqytta Iran Syrtqy ister mınıstrligi AQSh-ty Izraıldiń Lıvandaǵy áskerı áreketterin toqtata almady dep aıyptaǵan málimdeme jarııalady.
Mınıstrliktiń málimdeýinshe, Vashıngton Izraıldi Lıvandaǵy «Hezbollaǵa» qarsy operatsııasyn toqtatýǵa májbúrleýge tyrysqanymen, Iranǵa qarsy bitimniń buzylýyna da, Izraıldiń Lıvanǵa qatysty bitimdi buzýyna da AQSh tikeleı jaýapty.
– Qurama Shtattar bul jaǵdaıdyń saldary men yqtımal órshýi úshin jaýap beredi, – delingen málimdemede.
Iran tarapy sondaı-aq:
– Iran Islam Respýblıkasy óziniń barlyq múmkindigi men áleýetin paıdalana otyryp jáne zańdy ózin-ózi qorǵaý quqyǵyna súıene otyryp, qajet dep sanaǵan jerde óz múddelerin qorǵaıdy, – dep málimdedi.
Budan bólek, ırandyq buqaralyq aqparat quraldary Tegerannyń «túbegeıli sharalar qabyldaý, jańa maıdandar ashý jáne Ormýz buǵazyndaǵy tepe-teńdikti saqtaý arqyly qorǵanys operatsııalaryn júrgizýge daıyn» ekenin aıtqan eki ırandyq generaldyń sózin keltirdi.
Irannyń joǵarǵy kóshbasshysynyń keńesshisi ári Islam revolıýtsııasy saqshylar korpýsynyń qolbasshysy Mohsen Rezaı X áleýmettik jelisindegi jazbasynda:
– Biz teńiz qorshaýynyń jalǵasýyna jol bermeımiz jáne Lıvandaǵy shıelenistiń ýshyǵýyna da tózbeımiz. Iran Islam Respýblıkasynyń qarýly kúshteriniń sabyrynyń da shegi bar, – dedi Mohsen Rezaı.
Eske sala ketsek, buǵan deıin Iran Lıvandaǵy jaǵdaıǵa baılanysty AQSh-pen deldaldar arqyly júrgiziletin baılanystardy toqtatqanyn jazdyq.
