Tramp Izraıldiń Iranǵa soqqy berýine qarsy — BAQ
ASTANA. KAZINFORM — Izraıl Iranǵa qarsy aýqymdy áskerı operatsııany qaıta bastaýǵa daıyndalǵan. Biraq ony ótkizý merzimine qatysty Vashıngtonmen kelispeı, josparyn ózgertti, dep habarlaıdy Kazinform agenttiginiń menshikti tilshisi.
Izraıl premer-mınıstri Bınıamın Netanıahý Iranǵa qarsy aýqymdy áskerı operatsııany 10-11 qazanda ótkizýdi kózdegen. AQSh prezıdenti Donald Tramp 3 qarashada ótetin Kongress saılaýyna deıin mundaı áskerı qımyldardy qaıta bastaýǵa qarsy boldy.
The Times of Israel basylymynyń habarlaýynsha, Izraıl áskeri Irannyń ıadrolyq nysandaryna, memlekettik mekemeler men elektr stansalaryna, sondaı-aq basqa da azamattyq nysandarǵa birneshe kún áýeden soqqy jasaýdy kózdegen. Jańa operatsııanyń aýqymy men qarqyny bıyl aqpanda AQSh pen Izraıldiń Iranǵa birlesip jasaǵan soqqylarynan da asyp túsýge tıis edi.
Basylymnyń málimetinshe, Izraıl armııasy Irannyń ıadrolyq nysandaryna, memlekettik mekemelerdiń ınfraqurylymyna, elektr stansalary men basqa da azamattyq nysandarǵa birneshe kún áýeden soqqy jasaýdy kózdegen. Jańa operatsııanyń aýqymy men qarqyny bıyl aqpanda AQSh pen Izraıldiń Iranǵa birlesip jasaǵan soqqylarynan da asyp túsýge tıis edi.
AQSh prezıdenti aralyq saılaý qarsańynda áskerı operatsııa ótkizýge qoldaý bildirmegen. Al josparlanǵan soqqylarǵa amerıkalyq áskerdiń tikeleı qatysýy kózdelgen-kózdelmegeni ázirge belgisiz.
Aldaǵy aptalarda áskerı qımyldar qaıta bastalýy múmkin. Mundaı jaǵdaıdyń oryn alýyn derekkóz joqqa shyǵarmaıdy.
Basylymnyń málimetinshe, Izraıl jańa barlaý derekterin eskere otyryp, Iran aýmaǵyndaǵy nysandardyń jańartylǵan tizimin AQSh-qa usynǵan. Oǵan buǵan deıingi áskerı operatsııa kezinde soqqy jasalmaǵan azamattyq ınfraqurylym nysandary da engizilgen.
Vashıngton men Tel-Avıv arasyndaǵy kelispeýshilikter týraly aqparat eki eldiń áskerı basshylyǵy kelissózderdi jalǵastyryp jatqan tusta jarııalandy.
19 qazanda AQSh qorǵanys mınıstri Pıt Hegset Izraılge aldyn ala jarııalanbaǵan saparmen baryp, Negev shólindegi Ývda áýe bazasynda Bınıamın Netanıahýmen kezdesti.
Izraıl premer-mınıstriniń ókili Doron Shpılman kezdesýdiń ótkenin rastap, taraptar aımaqtaǵy qaýip-qaterdi jáne qorǵanys pen shabýyl baǵytyndaǵy AQSh-Izraıl yntymaqtastyǵyn talqylaǵanyn atap ótti.
Onyń sózinshe, Hegset Izraılge AQSh-tyń birneshe myń áskerı qyzmetkerin ornalastyrýǵa múmkindik bergeni úshin alǵys bildirgen.
Pentagon AQSh qorǵanys mınıstriniń saparyna qatysty ázirge resmı túsinikteme bergen joq.
AQSh ákimshiligi qarashadaǵy saılaýǵa deıin Iranǵa soqqy jasaýdy qaıta bastaýǵa qarsy. Aq úı baspasóz hatshysynyń orynbasary Anna Kellı Vashıngtonnyń 3 qarashaǵa deıin mundaı operatsııa júrgizýdi josparlamaıtynyn rastady.
Izraılde Iranmen soǵysty qaıta bastaý máselesi 27 qazanǵa belgilengen parlament saılaýy qarsańynda talqylanyp jatyr.
Buǵan deıin Izraıldiń 12-arnasy Netanıahýdyń Trampty eki elde de saılaý ótpeı turyp Iranǵa soqqy berýdi qaıta bastaýǵa shaqyrǵanyn habarlaǵan. Degenmen Izraıl premer-mınıstri saılaýǵa deıin jańa áskerı operatsııa bastaýǵa nıetti emes ekenin ashyq málimdegen.
Izraıl BAQ-tarynyń habarlaýynsha, armııa Bas shtabynyń bastyǵy Eıal Zamır jaýyngerlik ázirlikti kúsheıtý maqsatynda saılaý kúnine deıin áskerı qyzmetshilerdiń demalysyn toqtatýǵa buıryq bergen.
Sonymen qatar Iran prezıdenti AQSh pen Izraıldiń Gazadaǵy áreketin genotsıd dep ataǵanyn jazǵan edik.
