Tramp Izraıldiń Batys jaǵalaýdy anneksııalaý josparyn synady

ASTANA. KAZINFORM — AQSh prezıdenti Donald Tramp Izraıldiń Iordan ózeniniń batys jaǵalaýyndaǵy okkýpatsııalanǵan aýmaqtardy yqtımal anneksııalaýyn qoldamaıtynyn málimdedi, dep habarlaıdy DW. 

— Men Izraıldiń Batys jaǵalaýdy anneksııalaýyna jol bermeımin. Joq, men muny boldyrmaımyn. Bul bolmaıdy, — dep keltirdi NBC News AQSh prezıdentiniń sózin.

Eki kóshbasshy brıfıng aldynda telefon arqyly sóıleskende Tramp bul máseleni Izraıl premer-mınıstri Bınıamın Netanıahýmen talqylady ma degen suraqqa AQSh prezıdenti «Onymen sóılessem de, sóılespesem de, Izraıldiń Batys jaǵalaýdy anneksııalaýyna ruqsat bermeımin. Jeter. Toqtaıtyn ýaqyt keldi» dep jaýap berdi.

Bul máseleni talqylaý birneshe Batys elderi — Frantsııa, Ulybrıtanııa, Kanada jáne Aýstralııanyń Palestınany memleket retinde moıyndaǵanyn jarııalaýy aıasynda bastalǵany atap ótildi.

Netanıahý buǵan úzildi-kesildi qarsy shyǵyp, «Iordan ózeniniń batysynda Palestına memleketi qurylmaıtynyn» málimdedi. Ol Iordan ózeniniń batys jaǵalaýynda, Izraıl basyp alǵan Palestına aýmaqtarynda evreı qonystaryn keńeıtý nıeti týraly jarııalady.