Tramp: Izraıl men Lıvan 10 kúndik bitimge keldi
ASTANA. KAZINFORM – AQSh prezıdenti Donald Tramp Izraıl men Lıvan basshylary atysty toqtatý týraly kelisimge kelgenin málimdedi.
Onyń aıtýynsha, taraptarmen júrgizilgen kelissózder nátıjesinde 10 kúndik bitim jarııalaý jóninde ýaǵdalastyqqa qol jetkizilgen.
– Men Lıvan prezıdenti Jozef Aýn jáne Izraıl premer-mınıstri Bınıamın Netanıahýmen óte nátıjeli kelissózder ótkizdim. Eki el kóshbasshysy beıbitshilikke qol jetkizý maqsatynda 10 kúndik atysty toqtatý rejımin resmı túrde jarııalaýǵa kelisti, – dep jazdy Donald Tramp óziniń Truth Social áleýmettik jelisindegi paraqshasynda.
Aq úı basshysynyń málimdeýinshe, bitim AQSh-tyń shyǵys jaǵalaýy ýaqyty boıynsha keshki saǵat 17:00-den, ıaǵnı jergilikti ýaqytpen jumaǵa qaraǵan túni 00:00-den bastap kúshine enedi.
Tramp buǵan deıin AQSh-ta Izraıl men Lıvan ókilderi arasynda sońǵy 34 jyldaǵy alǵashqy resmı kelissózder ótkenin eske saldy. Onyń sózinshe, bul protsesti jalǵastyrý úshin AQSh memlekettik hatshysy Marko Rýbıo, vıtse-prezıdent Djeı Dı Vens jáne Birikken shtabtar komıtetiniń tóraǵasy Den Reızın taraptarmen birlesip jumys isteıtin bolady.
– Biz Izraıl men Lıvan arasynda uzaqmerzimdi beıbitshilikke qol jetkizý úshin barlyq múmkindikti paıdalanamyz, – dedi AQSh prezıdenti.
Sonymen qatar Tramp Lıvan men Izraıl basshylaryn Aq úıge shaqyrý jospary bar ekenin jetkizdi.
Aıta keteıik, Lıvandaǵy atysty toqtatý máselesi AQSh pen Iran arasyndaǵy kelissózderde de kóterilgen bolatyn. Bul kelissózder Pákistan astanasy Islamabadta bastalǵanymen, alǵashqy kezdesý naqty nátıje bermegen.
Qazirgi ýaqytta Izraıl Lıvan aýmaǵynda Hezbolla qozǵalysyna qarsy áskerı operatsııa júrgizip otyr. Atalǵan top bitimge qatysty ázirge resmı málimdeme jasaǵan joq.
Buǵan deıin «Hezbolla» ókili Hýseın Hadj Hasan Lıvan bıliginiń Izraılmen tikeleı kelissóz júrgizýin synǵa alyp, mundaı qadamdy «qate sheshim» dep baǵalaǵan.
Lıvan men Izraıl arasyndaǵy qaqtyǵys 2 naýryzdan beri shıelenise túsken. Izraıl «Hezbolla» tarapynan jasalǵan shabýyldarǵa jaýap retinde Lıvan aýmaǵyn atqylaı bastaǵan.
Eske sala keteıik, Lıvan men Izraıl 1948 jyldan beri resmı túrde soǵys jaǵdaıynda. Sońǵy tikeleı kelissózder 1993 jyly ótken bolatyn.
Buǵan deıin BUU Bas hatshysy Izraıldiń Lıvan aýmaǵyna jasaǵan soqqylaryn aıyptaǵany habarlanǵan bolatyn.