Tramp Izraıl men Iran arasynda beıbitshilik ornatýǵa ýáde berdi

ASTANA. KAZINFORM — AQSh prezıdenti Donald Tramp Truth áleýmettik jelisinde qaqtyǵysýshy taraptardy bitimge kelýge shaqyryp, Izraıl men Iran arasynda beıbitshilik ornatýǵa ýáde berdi, dep habarlaıdy Kazinform menshikti tilshisi. 

— Iran men Izraıl mámile jasaýy kerek, men Úndistan men Pákistandy mámile jasatqanymdaı olar da kelisim jasaıdy, — dep jazdy Donald Tramp TruthSocial áleýmettik jelisinde. 

Tramp prezıdent retindegi birinshi merziminde Serbııa men Kosovo arasynda, sondaı-aq Mysyr men Efıopııa arasyndaǵy qaqtyǵysty toqtatqanyn atap ótti. 

— Dál osylaı bizde jaqyn arada Izraıl men Iran arasynda beıbitshilik ornaıdy! Qazir kóptegen qońyraý men kezdesý bolyp jatyr, — dep qosty AQSh prezıdenti.

Tramp Izraıldiń Irannyń rýhanı kósemi aıatolla Álı Hameneıdi óltirý týraly usynysyn qabyldaǵan joq, dep habarlady amerıkalyq sheneýnik NBC News arnasyna. 

Kalıfornııalyq demokrat senator Adam Shıff pen Kentýkkı shtatynan respýblıkashyl senator Rend Pol «Baspasózben kezdesý» baǵdarlamasynyń júrgizýshisi Krısten Ýelkerge AQSh Iranmen áskerı qaqtyǵysqa barýdan saq bolýy kerek ekenin málimdedi.

Óz kezeginde Izraıl deldal retinde áreket etetin batys elderi arqyly Irannan shabýyldardy toqtatyp, ıadrolyq kelissózge qaıta oralýyn surady, dep habarlady Tegerandaǵy joǵary laýazymdy ırandyq derekkóz NBC News-ke. 

Buǵan deıin Izraıl premer-mınıstri Netanıahý Irannyń Izraılge qatysty málimdemesin kúmánmen qabyldaǵanyn jazǵan bolatynbyz.