Tramp Izraıl men Iran arasynda atystyń tolyq toqtatylǵanyn jarııalady
ASTANA. KAZINFORM — Kelisim AQSh pen Qatardyń birlesken deldaldyǵynyń nátıjesi boldy, dep habarlaıdy Kazinform menshikti tilshisi.
AQSh prezıdenti Donald Tramp Izraıl men Iran arasynda 12 kúnge sozylǵan qarýly qaqtyǵysty toqtatýǵa baǵyttalǵan «atysty tolyq jáne túpkilikti» toqtatý týraly rejımine qol jetkizilgeni týraly jarııalady. Bul týraly ol dúısenbi kúni keshke Truth Social platformasynda jarııalanǵan resmı málimdemesinde habarlady.
— Eger bári josparlaǵandaı bolsa — dál solaı bolady, — men eki el, Izraıl men Irandy qazirgi «On eki kúndik soǵys» dep ataýǵa bolatyn soǵysty toqtatýǵa múmkindik bergen tózimdilik, batyldyq jáne aqyl-parasattylyqpen quttyqtaımyn, — dep jazdy Amerıka prezıdenti.
Tramptyń aıtýynsha, atysty toqtatý rejımi kezeń-kezeńimen kúshine enedi: taraptar alǵashqy aǵymdaǵy operatsııalardy alty saǵat ishinde aıaqtaıdy, al atysty tolyq toqtatý 24 saǵat ishinde júzege asyrylady. Ol sondaı-aq Irannyń rejımdi dereý saqtaı bastaıtynyn, al Izraıldiń 12 saǵattan keıin oryndaıtynyn qosyp ótti.
Reuters agenttiginiń Aq úıdegi derekkózge silteme jasap habarlaýynsha, kelisimge Tramp pen Izraıl premer-mınıstri Bınıamın Netanıahý telefon arqyly sóıleskennen keıin qol jetkizilgen.
Iran tarapymen kelissózge AQSh vıtse-prezıdenti Djeı Dı Vens, Memlekettik hatshy Marko Rýbıo jáne AQSh-tyń Taıaý Shyǵys jónindegi arnaıy ókil Stıv Ýıtkoff qatysqany bólek atap ótildi.
Reuters agenttigi málim etkendeı, Irannyń atysty toqtatý týraly kelisimine Qatar premer-mınıstri sheıh Muhammad bın Abdýlrahman ál-Tanı men Iran basshylyǵy ókilderiniń telefon arqyly sóılesýinen keıin qol jetkizildi.
Habardar derekkózdiń naqtylaýynsha, bul áńgime AQSh-tyń jeksenbi kúni Irandaǵy ıadrolyq nysandaryna jasaǵan soqqylaryna jaýap retinde Irannyń AQSh-tyń Qatardaǵy bazasyna zymyrandyq shabýyl jasaǵannan keıin kóp uzamaı ótken. Prezıdent Tramp NBC News arnasyna bergen suhbatynda qol jetkizilgen kelisimniń uzaq merzimdi bolatynyna senim bildirdi.
— Men bul bitim máńgilik bolady dep oılaımyn, — dedi ol.
Iran Qatar-Amerıka usynysyna kelisetinin rastady, bul rette Izraıl áli resmı túsinikteme bergen joq.
Alaıda Izraıl úkimetiniń derekkózi buǵan deıin naýqandy aıaqtaýdy qalaıtynyn bildirip, muny Vashıngtonǵa jetkizgen.
Eske sala ketsek, 13 maýsymǵa qaraǵan túni Izraıldiń áskerı-áýe kúshteri Iranǵa soqqy jasady. Tegeranda jarylystardyń dybysy estildi. Izraıl tótenshe jaǵdaı rejımin jarııalap, óziniń áýe keńistigin japty. Iran Izraıl soqqysynan joǵary áskerı qolbasshylary men jetekshi ǵalymdary qaza tapqanyn rastady.
Jaýap retinde Iran Izraıl baǵytyna 100-den astam ushqyshsyz ushý apparatyn (dron) jiberdi.
AQSh prezıdenti Donald Tramp Irannyń ıadrolyq ınfraqurylymyna qarsy júrgizilgen «óte sátti» áskerı operatsııa týraly málimdedi.