Tramp Irannyń ıadrolyq nysandaryn taǵy da «joıyp jiberemin» dep ses kórsetti
ASTANA. KAZINFORM — AQSh prezıdenti Donald Tramp Irannyń ıadrolyq nysandary qaıta iske qosylatyn bolsa, olardy «saýsaǵyn kóterip úlgergenshe joıyp jiberemin» dep málimdedi, dep jazdy DW.
Dúısenbi kúni Shotlandııada Ulybrıtanııa premer-mınıstri Kır Starmermen kezdesýi kezinde BAQ ókilderine bergen suhbatynda Tramp:
— Biz Irannyń ıadrolyq múmkindikterin joıdyq. Olar qaıta iske qosa alady. Eger olaı etse, biz olardyń (ıadrolyq nysandaryn) saýsaǵyńyzdy kóterip úlgergenshe joıyp jiberemiz, — dedi.
Iran syrtqy ister mınıstri: «Biz ýran baıytýdan bas tartpaımyz»
21 shildede Iran syrtqy ister mınıstri Abbas Aragchı Fox News telearnasyna bergen suhbatynda Tegeran AQSh-tyń shabýyldaryna qaramastan ýran baıytýdan bas tartpaıtynyn málimdedi.
— Biz bul jumysty toqtattyq, sebebi zalal óte aýyr boldy. Biraq biz odan bas tarta almaımyz, óıtkeni bul — bizdiń ǵalymdarymyzdyń jetistigi, — dedi Aragchı. Onyń aıtýynsha, endi bul — ulttyq abyroıdyń máselesi. Bolashaqtaǵy kez kelgen ıadrolyq kelisim Iranǵa ýran baıytý quqyǵyn berýge tıis ekenin de atap ótti.
Iran SІM basshysynyń «H» (burynǵy Twitter) jelisindegi jazbasy:
28 shildede Iran syrtqy ister mınıstri X áleýmettik jelisinde:
— Eger agressııa taǵy qaıtalansa, biz budan da qatań ári jasyrynýǵa kelmeıtin jaýap qaıtaramyz, — dep jazdy.
Sol jazbasynda ol taǵy da Tegerannyń ýran baıytýdy jalǵastyrýy qajet ekenin aıtty:
— Bári bilsin: biz, ırandyqtar, beıbit ıadrolyq baǵdarlamamyzdy satyp alǵan joqpyz — ony qanmen, termen jáne kóz jasymen qurdyq. Bizdiń adam resýrstarymyz ázirlegen tehnologııa men noý-haýdy bombalarmen joıý múmkin emes, — dedi ol.
AQSh-tyń Iranǵa jasaǵan soqqylary
22 maýsymǵa qaraǵan túni AQSh áskerıleri Irannyń ıadrolyq baǵdarlamasyna qatysty úsh nysanǵa áýe shabýylyn jasady — olar Fordo, Natanz jáne Isfahan qalalaryndaǵy obektiler.
Donald Tramp sol kezdegi halyqqa úndeýinde:
— Irannyń ýran baıytýǵa arnalǵan negizgi nysandary joıyldy, — dep málimdedi.
Iran bıligi shabýyl faktisin rastaǵanymen, onyń orny tolmas zalal keltirmegenin alǵa tartty.
Eske sala keteıik, Iran Syrtqy ister mınıstriniń orynbasary Abbas Arakchı Iran ýrandy baıytý jumystaryn jalǵastyrady jáne bul quqyǵynan bas tartpaıtynyn málimdegenin jazǵan edik.