Tramp Irannyń soǵysty toqtatý jónindegi usynystaryn qabyldamady
ASTANA. KAZINFORM – AQSh prezıdenti Donald Tramp Irannyń Vashıngton usynǵan soǵysty toqtatý josparyna qatysty qarsy usynystaryn qabyldamady. Bul týraly BBC habarlady.
Basylym málimetinshe, AQSh pen Iran arasyndaǵy deldal qyzmetin atqaryp otyrǵan Pákistan premer-mınıstri Tegerannyń jospary alynǵanyn rastaǵan.
AQSh óz usynystaryn resmı túrde jarııalaǵan joq. Alaıda BAQ deregine sáıkes, mundaǵy basty másele Irannyń ıadrolyq baǵdarlamasy boıynsha kelissózderge jol ashýy múmkin 14 tarmaqtan turatyn memorandým týraly bolyp tur.
Donald Tramp Truth Social áleýmettik jelisinde Iran ókilderinen kelgen jaýappen tanysqanyn jazdy.
– Maǵan ol unamady. Múlde qabyldaýǵa kelmeıdi! – dep málimdedi Donald Tramp.
Sonymen birge AQSh prezıdenti amerıkalyq jospardyń naqty mazmunyn jáne Iran jaýabynyń mánin ashyp aıtpady.
Habarlamada atysty toqtatý rejımi jalpy saqtalyp otyrǵany aıtylǵan. Degenmen aımaqta júk kemelerine shabýyldar men ushqyshsyz apparattardyń soqqylary jalǵasýda.
Iran Ormýz buǵazyn buǵattaýdy jalǵastyryp otyr. Bul álemdik munaı baǵasynyń ósýine áser etýde.
Al AQSh Iran porttaryna qatysty blokadany kúsheıtip, Tegeranǵa qysymdy arttyrýǵa jáne óz sharttaryna kóndirýge tyrysyp jatyr.
Aıta keteıik, buǵan deıin Irandaǵy qaqtyǵys saldarynan álemdik munaı qorynyń jyldam azaıyp bara jatqany habarlanǵan edi.
