Tramp Irannyń energetıkalyq ınfraqurylymyna soqqy jasaýdy eki aptaǵa shegerdi
ASTANA. KAZINFORM – Amerıka Qurama Shtattary Irannyń azamattyq ınfraqurylymyna yqtımal soqqy jasaýdy eki aptaǵa keıinge qaldyrdy. Bul týraly seısenbi kúni AQSh prezıdenti Donald Tramp Truth Social áleýmettik jelisindegi paraqshasynda málimdedi.
— Pákistan Premer-mınıstri Shahbaz Sharıfpen jáne feldmarshal Asım Mýnırmen júrgizilgen kelissózderdiń, sondaı-aq olardyń Iranǵa qarsy búgin keshke joıqyn kúsh qoldanýdy keıinge qaldyrý jónindegi ótinishteriniń negizinde, Islam Respýblıkasy Ormýz buǵazyn tolyq, dereý jáne qaýipsiz túrde ashýǵa daıyn bolǵan jaǵdaıda, men Irandy bombalaý men oǵan shabýyl jasaýdy eki apta merzimine toqtatýǵa kelisemin, — dep jazdy ol Truth Social áleýmettik jelisinde.
Seısenbi kúni Pákistan Premer-mınıstri AQSh prezıdentinen Iranmen kelisimge kelý úshin belgilengen sońǵy merzimdi taǵy eki aptaǵa uzartýdy surady. Onyń aıtýynsha, jaǵdaıdy dıplomatııalyq jolmen retteý baǵytyndaǵy kúsh-jiger «turaqty túrde ilgerilep keledi jáne taıaý bolashaqta eleýli nátıjelerge alyp kelýi múmkin.
Shahbaz Sharıf Iran bıligine osy merzim ishinde «izgi nıet belgisi retinde» Ormýz buǵazyn ashýdy usyndy.
Axios basylymyna 5 sáýirde bergen suhbatynda AQSh prezıdenti Iranmen 7 sáýirge deıin mámilege kelý múmkindigi joǵary ekenin boljaǵan edi. Buǵan deıin ol Truth Social áleýmettik jelisinde, eger Iran 6 sáýirge deıin Ormýz buǵazy arqyly aýqymdy keme qatynasyn qaıta jandandyrýǵa jaǵdaı jasamasa, energetıkalyq jáne azamattyq ınfraqurylymǵa soqqy jasalýy múmkin ekenin eskertken edi.
Sondaı-aq ol Irandy seısenbiniń bir túninde «joıyp jiberemin» dep qorqytty.
Keıin Amerıka kóshbasshysy yqtımal kelisimge qol jetkizý merzimin taǵy bir kúnge – 8 sáýirge deıin uzartty.
Al Irandaǵy ushqyshtyń qutqarylýy týraly aqparat taratqandar sottalady dep qorqytty.
