Tramp Irannyń bitimge kelý týraly usynysynan bas tartqanyn rastady
ASTANA. KAZINFORM — AQSh prezıdenti Donald Tramp Irannyń bir aptaǵa atysty toqtatý jáne Ormýz buǵazyn ashý týraly usynysyn qabyldamaǵanyn rastady, dep habarlaıdy DW.
— Men olardyń usynysyn qabyldamaımyn. Olar birden buǵazdy ashý týraly kelisim jasaǵysy keledi, óıtkeni orasan zor shyǵynǵa ushyrap jatyr. Olar kelisim jasaǵysy keledi, menińshe, bul qalypty jaǵdaı. Men de kelisim jasaǵandy unatamyn, biraq mundaı kelisimge jol berilmeıdi, — dedi Tramp 26 qyrkúıekte jýrnalısterge.
Buǵan deıin Tegeran birqatar shart oryndalǵan jaǵdaıda bir aptadan keıin Ormýz buǵazy arqyly kemelerdiń qozǵalysyn qalpyna keltirýdi jáne qaqtyǵysty uzaq merzimdi retteý jónindegi kelissózderdi qaıta bastaýdy Vashıngtonǵa usynǵan.
DW habarlaǵandaı, Iran prezıdenti Masýd Pezeshkıan AQSh sanktsııalary men teńiz blokadasy kúshinde bolǵansha, Tegeran Ormýz buǵazy arqyly kemelerdiń erkin ótýin qamtamasyz etpeıtinin málimdegen.
AQSh pen Iran arasyndaǵy úshinshi taraptardyń araǵaıyndyǵymen júrgizilip jatqan kelissózder jalǵasyp jatyr. 23 qyrkúıekte Tramp eki el arasyndaǵy BUU Bas Assambleıasy aıasyndaǵy baılanystardyń «óte nátıjeli» bolǵanyn aıtqan edi. Irannyń memlekettik buqaralyq aqparat quraldarynyń málimetinshe, Tegeran sol kezde keme qatynasyn qaıta jandandyrý sharttarynyń qatarynda teńiz blokadasyn toqtatýdy, buǵattalǵan aktıvterdi bosatýdy jáne áskerı qımyldardy toqtatýdy ataǵan.
Aıta ketelik Tegeran Ormýz buǵazyn ashýǵa daıyn ekenin málimdep, AQSh-qa shart qoıǵany týraly jazǵan edik.
