Tramp Iranmen tikeleı kelissóz júrgizip jatyr

ASTANA. KAZINFORM –  Donald Tramp AQSh-tyń Iranmen tikeleı kelissóz júrgizip jatqanyn málimdep, 12 sáýirde ótetin mańyzdy kezdesý týraly jarııalady, dep habarlaıdy DW aqparat agenttigi.

AQSh prezıdenti eger taraptar ıadrolyq kelisimge qol jetkize almasa, Tegeranǵa «úlken qaýip» tónedi dep qorqytty.

- Biz Iranmen tikeleı kelissóz júrgizip jatyrmyz jáne olar qazirdiń ózinde bastaldy, - dedi ol 7 sáýirde Izraıl premer-mınıstri Bınıamın Netanıahýmen kezdesýden keıin Aq úıde tilshilerge.

Aq úı basshysynyń aıtýynsha, aldaǵy senbi, 12 sáýirde «óte mańyzdy tikeleı, is júzinde joǵary deńgeıde kezdesý» ótedi dep josparlanǵan.

Tramp Irandy «úlken qaýip tónedi» dep qorqytty

- Meniń oıymsha, bári kelisimge qol jetkizýge qolaıly bolady dep kelisedi, - dep qosty Tramp.

Áıtpese, kelissóz sátsiz aıaqtalsa, ol Irandy «úlken qaýip tónedi» dep qorqytty.

- Irannyń ıadrolyq qarýy bolýy múmkin emes jáne eger kelissóz sátti bolmasa, bul Iran úshin óte jaman kún bolady dep oılaımyn, - dedi Aq úı basshysy.

Tramptyń aıtýynsha, ol Netanıahýmen kezdesýinde Iran taqyrybyn talqylaǵan.

Iran Syrtqy ister mınıstri: Kezdesý Omanda ótedi

Iran Syrtqy ister mınıstri Abbas Aragchı Tegeran men Vashıngton arasynda josparlanǵan kelissóz týraly rastap, olardyń janama sıpatyn belgiledi. Kezdesý Omanda ótedi jáne «ári múmkindik, ári synaq» ekenin túsindirdi.

- Dop Amerıkanyń alańynda, - dep jazdy Aragchı X mıkroblogtary jelisinde.

Buǵan deıin Iran basshylyǵy AQSh ákimshiligimen tikeleı kelissózden bas tartqanymen, janama dıalogqa daıyn ekenin tanytty. 

Iran prezıdenti Masýd Pezeshkıannyń aıtýynsha, Tegeran Tramptyń hatyna Oman arqyly jaýap bergen. Bul rette Qurama Shtattar tarapynan shabýyldan qaýiptengen Irannyń rýhanı jetekshisi aıatolla Álı Hameneı eldiń qarýly kúshterin joǵary daıyndyqqa shaqyrdy.