Tramp Iranmen kelissóz júrgizý týraly usynystardy qabyldamady

ASTANA. KAZINFORM – AQSh prezıdenti Donald Tramp Taıaý Shyǵystaǵy odaqtas elder usynǵan Iranmen kelissózder júrgizý bastamasyn qabyldamady, dep habarlady Reuters agenttigi.

Agenttik málimetinshe, sońǵy eki apta ishinde Oman AQSh pen Iran arasynda dıalog ornatýǵa birneshe ret áreket jasaǵan. Alaıda Aq úı bul bastamaǵa qyzyǵýshylyq tanytpaıtynyn anyq bildirgen.

Derekkózderdiń biriniń aıtýynsha, Donald Tramp soǵysty jalǵastyrýdy qalaıdy, óıtkeni bul Iran Islam Respýblıkasynyń áskerı áleýetin odan ári álsiretedi dep sanaıdy. Sheneýniktiń sózinshe, kelissózder kúni «múmkin bir kúni týar, biraq qazir emes».

Reuters agenttiginiń basqa derekkózderi Egıpet te buǵan deıin Vashıngton men Tegeran arasyndaǵy deldal elderdiń biri bolǵanyn aıtady. Soǵys bastalǵannan keıin de Egıpet eki tarap arasynda baılanys ornatýǵa talpynys jasaǵan.

Alaıda bul áreketter nátıje bermegen. Degenmen agenttik málimetinshe, Kaır Iran áreketterinen zardap shekken kórshi elder tarapynan belgili bir deńgeıde áskerı ustamdylyqqa qol jetkizýge yqpal etken.

Iran tarapyndaǵy derekkózderdiń aıtýynsha, Tegeran bıligi de birqatar elderdiń atysty toqtatý jónindegi usynystaryn qabyldamaǵan. Islam Respýblıkasynyń basshylyǵy aldymen AQSh pen Izraıl tarapynan jasalyp jatqan shabýyldardyń tolyq toqtatylýyn, sondaı-aq keltirilgen shyǵyn úshin ótemaqy tólenýin talap etip otyr.

Eske sala ketsek, Iran Izraıl men AQSh bazalaryn ballıstıkalyq zymyranmen atqylaǵanyn málimdedi.

Al BUU Qaýipsizdik Keńesi Iran kórshi elderge shabýyldaryn dereý toqtatýy kerektigin eskertti.