Tramp: Iranmen kelisimniń jaǵdaıy 10 kún ishinde anyqtalady

VAShINGTON. KAZINFORM — AQSh prezıdenti Donald Tramp beısenbi, 19 aqpanda, jaqyn arada Iranmen kelisimniń múmkindigi anyqtalatynyn málimdedi jáne eger kelissózder sátti aıaqtalmasa, Vashıngton eskalatsııaǵa barýǵa májbúr bolýy múmkin ekenin eskertti, dep habarlaıdy Anadoly.

— Bálkim, biz ári qaraı qadam jasaýǵa májbúr bolamyz, bálkim, onyń qajeti bolmas, — dedi ol Vashıngtondaǵy Beıbitshilik keńesiniń alǵashqy otyrysynda.

Ol osyǵan qatysty jaǵdaıdyń «10 kún ishinde aıqyndalýy múmkin» ekenin aıtty.

Tramp óz dıplomattarynyń Iran ókilderimen senimdi jumys baılanystaryn ornatqanyn jáne kelissózderdiń jaqsy júrip jatqanyn aıtty.

— Qazir Iranǵa aıryqsha nazar aýdarylyp otyr. Olar kezdesip turady, Iran ókilderimen qarym-qatynasy jaqsy. Kelissózder jaqsy júrip jatyr, — dep qosty ol.

Sonymen qatar, Tramp Tegeranmen «mańyzdy kelisimge» qol jetkizý tarıhı turǵydan qıyn ekenin moıyndady.

— Kóptegen jyl boıy Iranmen mańyzdy kelisimge qol jetkizý ońaı emestigi dáleldendi. Degenmen, biz mańyzdy kelisimge qol jetkizýimiz kerek. Áıtpese, jaǵymsyz jaǵdaılar oryn alady,— dep qorytyndylady AQSh prezıdenti.

Budan buryn Tramp Iranǵa shabýyldy senbi kúni maquldaýy múmkin ekenin aıtyldy.