Tramp: Iranmen kelisim jasalmaıynsha aktıvter buǵattan shyǵarylmaıdy
ASTANA. KAZINFORM – AQSh prezıdenti Donald Tramp Iranmen yqtımal kelisim aıasynda Tegerannyń buǵattalǵan aktıvterin merziminen buryn bosatpaıtynyn jáne sanktsııalardy aldyn ala alyp tastamaıtynyn málimdedi, dep habarlaıdy DW.
NBC News telearnasynyń Meet the Press baǵdarlamasyna bergen suhbatynda Tramp mundaı qadamdar tek beıbit kelisimge qol qoıylǵannan keıin ǵana qarastyrylatynyn aıtty.
– Bul keıin bolady. Eger olar ózin durys ustap, tıisti qadamdar jasasa, biz bul máseleni talqylaı bastaımyz, – dedi AQSh prezıdenti.
Sonymen qatar Aq úı basshysy Iranmen qysqa merzimdi kelisimge Lıvannyń qosylýyn talap etpeıtinin jetkizdi.
– Menińshe, olar muny qalar edi, biraq men ondaı talap qoımaımyn, – dedi Tramp.
Ol sondaı-aq Izraıldi Lıvanda ornalasqan «Hezbolla» qozǵalysyna qarsy «naqtyraq ári nysanaly» soqqylar jasaýǵa shaqyrdy.
– Men Lıvandaǵy jaǵdaıdyń jaqsarǵanyn, «Hezbollaǵa» qarsy soqqylar naqtyraq bolǵanyn qalaımyn. Olar anaǵurlym dál baǵyttalýy kerek dep oılaımyn, – dedi AQSh kóshbasshysy.
Tramp suhbat barysynda Irannyń joǵarǵy jetekshisi Modjtaba Hameneımen tikeleı kelissóz júrgizýge daıyn ekenin de málimdedi. Alaıda onyń naqty qaı jerde júrgeni týraly suraqqa jaýap bermedi.
– Onyń qaıda ekenin biletin-bilmeıtinimdi aıtqym kelmeıdi. Biraq bilýim ábden múmkin, – dedi ol.
DW málimetinshe, mamyr aıynyń sońynda Axios portaly AQSh pen Iran ókilderi aqpan aıynyń sońynan beri jalǵasyp kele jatqan áskerı qaqtyǵysty retteýge arnalǵan negizdemelik kelisim boıynsha aldyn ala ýaǵdalastyqqa qol jetkizgenin habarlaǵan.
Soǵan qaramastan, Donald Tramp ázirge kelisimdi qoldaǵan joq. Aqparat kózderiniń málimetinshe, Vashıngton Tegeran ıadrolyq qarý jasaý josparynan tolyq bas tartqan jaǵdaıda ǵana mámilege kelýge daıyn.
Iran bıligi de AQSh-pen soǵysty toqtatý jónindegi túpkilikti kelisimge áli qol jetkizilmegenin málimdedi.
Aıta keteıik, Tramptyń Iranǵa qatysty saıasaty respýblıkashyldar arasynda synǵa ushyraı bastaǵany habarlandy.
