Tramp Iranmen aldyn ala kelisimge qol qoıylǵanyn jarııalady
ASTANA. KAZINFORM – AQSh prezıdenti Donald Tramp Iranmen soǵysty toqtatý týraly aldyn ala kelisimge qol qoıylǵanyn málimdedi jáne kelisimniń egjeı-tegjeıleri «jaqyn arada» jarııalanatynyn shamalady, dep habarlaıdy VVS.
- Men oǵan qol qoıylǵanyn, kelisimge tolyqtaı qol qoıylǵanyn aıtýǵa qýanyshtymyn, - dedi ol G7 sammıtinde Frantsııa prezıdenti Emmanıýel Makronmen kelissóz barysynda.
AQSh-tyń joǵary laýazymdy sheneýnikteri de keı málimetti ashyp, Ormýz buǵazy juma kúni, ıaǵnı Jenevada kelisimge resmı qol qoıý josparlanǵan kúni qaıta ashylatynyn habarlady.
Olardyń aıtýynsha, Irannyń ıadrolyq baǵdarlamasy boıynsha tehnıkalyq kelissóz osy aptada bastalady dep kútilip otyr, al kez kelgen sanktsııalardy jeńildetý nemese aktıvterdi bosatý Irannyń kelisim boıynsha mindettemelerin oryndaýyna baılanysty bolady.
Vıtse-prezıdent Djeı Dı Vens dúısenbide CNN arnasyna bergen suhbatynda AQSh pen Iran arasyndaǵy ózara túsinistik týraly memorandýmnyń «shamamen bir jarym bet» ekenin jáne jalpy qujat ekenin málimdedi. Vens kóptegen málimet bolashaq kelissóz kezinde kelisiletinin qosyp ótti.
- Kelissózdiń tehnıkalyq kezeńinde birqatar máse boıynsha egjeı-tegjeıli málimetterdi pysyqtaýymyz kerek, biraq memorandým ırandyqtar kelisim boıynsha óz mindettemelerin oryndaý arqyly kelisimnen paıda kóretinine negiz jasaıdy, - dedi ol.
Venstiń aıtýynsha, qujattyń birinshi pýnktinde Irannyń «aımaqtyq beıbitshilik pen turaqtylyqty» qamtamasyz etýge mindettenetini, bul, onyń sózinshe, «terrorıstik uıymdardy» qarjylandyrýdy toqtatýdy qamtıtyny aıtylǵan.
- Eń bastysy, olar ıadrolyq qarý jasamaýǵa tekserilýge jatatyn mindetteme alady, - dedi Vens.
AQSh sheneýnikteri kelisimge elektrondy túrde Tramp, Vens jáne Iran parlamentiniń spıkeri Mohammad-Bager Galıbaf qol qoıǵanyn málimdedi. Olar sondaı-aq qosymsha málimet sársenbige qaraı jarııalanýy múmkin dep shamalady, Tramp bolsa kelisimniń tolyq mátini juma kúngi rásimnen keıin jarııalanatynyn aıtqan.
- Bul óte mańyzdy qujat jáne men onyń jarııalanǵanyn qalaımyn. Sondyqtan, múmkin, jaqyn arada», - dedi prezıdent.
Bul kelisim atysty toqtatýdy taǵy 60 kúnge uzartady, onyń barysynda taraptar sońǵy kelisimniń egjeı-tegjeıi boıynsha kelisedi.
Eske salsaq, Eýropanyń jetekshi elderi AQSh pen Iran arasyndaǵy kelisimge qatysty ún qatty.
Sondaı-aq AQSh pen Iran arasyndaǵy kelisimnen keıin munaı baǵasy tómendegenin habarladyq.
Iran men AQSh arasyndaǵy kelisimniń egjeı-tegjeıi belgili boldy.
