Tramp Iranǵa soqqy jasaý múmkindigi týraly eskertti

ASTANA. KAZINFORM – Iranmen kelissózder boıynsha eshqandaı belgi joq. Osyǵan qaraı AQSh-tyń málimdemesi jaǵdaıdy odan saıyn ýshyqtyryp jiberdi, dep habarlaıdy Kazinform menshikti tilshisi.

AQSh prezıdenti Donald Tramp Iranmen kelissóz júrgizýdiń merzimi ótkenin, al AQSh-tyń endigi soqqysy 2025 jylǵydan áldeqaıda kúshti bolatynyn málimdedi. Bul týraly ol sársenbi kúni óziniń Truth Social áleýmettik jelisindegi paraqshasynda jazdy.

Donald Tramptyń aıtýynsha, aımaqqa USS Abraham Lincoln áýe ushaqtaryn tasymaldaýshy kemesi bastaǵan iri áskerı-teńiz toby ketti. AQSh kóshbasshysy Irannyń keissózder júrgizip, ıadrolyq qarýdan bas tartýdy kózdeıtin kelisimge keledi degen úmitte ekenin jetkizdi.

— Ýaqyt tyǵyz. Men Iranǵa buǵan deıin kelisimge kelý kerektigin aıttym, — dedi Tramp.

Onyń sózinshe, eger kelisim jasalmasa, saldary byltyr Irannyń ıadrolyq ınfraqurylymyna qarsy júrgizilgen operatsııadan da aýyr bolýy múmkin.

Buǵan deıin Iran tarapy Vashıngtonmen baılanys ornady degen aqparatty joqqa shyǵarǵan bolatyn. Irannyń syrtqy ister mınıstri Abbas Aragchı sońǵy kúnderi AQSh-tyń arnaıy ókili Stıv Ýıtkoffpen habarlaspaǵanyn jáne kelissózder júrgizý týraly eshqandaı ótinish joldanbaǵanyn málimdedi.

— Qoqan-loqqy jaǵdaıynda kelissóz júrgizý múmkin emes. Dıalog tek qysym men shekten tys talaptar bolmasa ǵana ǵana júzege asady, — dedi Iran SІM basshysy.

Ol sonymen qatar jekelegen deldaldar keńes berý jumystaryn jalǵastyryp, Tegeranmen baılanysyn úzbegenin aıtty.

Buǵan deıin Iran prezıdenti Masýd Pezeshkıan Saýd Arabııasynyń taq murageri Muhammed ben Salmanmen áńgime barysynda Tegeran halyqaralyq quqyq aıasynda soǵystyń aldyn alýǵa jáne aımaqtaǵy shıelenisti tómendetýge baǵyttalǵan kez kelgen bastamany quptaıtynyn jetkizgen edi.

Osyǵan deıin Iran prezıdenti men Saýd Arabııasynyń taq murageri Taıaý Shyǵystaǵy shıelenisti azaıtýǵa daıyn ekenin málimdegeni týraly jazdyq.