Tramp Iranǵa shabýyldy senbi kúni maquldaýy múmkin
ASTANA. KAZINFORM – Aq úı Iranǵa múmkin áskerı operatsııanyń merzimin talqylap jatyr, biraq sońǵy sheshim áli qabyldanǵan joq, dep habarlaıdy Kazinform agenttiginiń menshikti tilshisi.
CBS News telearnasynyń dereginshe, AQSh prezıdenti Donald Tramp ulttyq qaýipsizdik júıesiniń joǵary laýazymdy tulǵalarynan Iranǵa shabýyl jasaýǵa áskerı daıyndyq týraly habar aldy. Bul shabýyl aldaǵy senbi kúni júzege asyrylýy múmkin.
Derekkózderdiń aıtýynsha, Aq úıdegi talqylaýlar «dınamıkalyq jáne jalǵasyp jatqan» sıpatta. Tramp shabýylǵa ruqsat beretin sońǵy sheshimdi áli qabyldaǵan joq. Alaıda operatsııanyń naqty ýaqyty jaqyn kúnderden keıinge qaldyrylýy múmkin, sebebi ákimshilik eskalatsııa táýekelin, sondaı-aq soǵys nemese shabýyldan bas tartý saıası jáne áskerı saldaryn baǵalap otyr.
Pentagon aldaǵy úsh kún ishinde Iran tarapynan múmkin jaýapty eskere otyryp, Batys Azııadaǵy keıbir personaldy ýaqytsha Eýropa nemese AQSh terrıtorııasyna shyǵarýdy josparlap otyr. Alaıda bul áreket áleýetti áskerı áreket aldynda standartty tájirıbe bolyp tabylady jáne shabýyldyń mindettiligin bildirmeıdi.
Sársenbi kúni Aq úıdiń Sıtýatsııalyq bólmesinde Iran máselesi talqylandy. AQSh resmı tulǵalarynyń málimeti boıynsha, naýryzdyń ortasyna deıin aımaqqa baǵyttalǵan barlyq áskerı kúsh tolyq ornalastyrylýy tıis.
Aýmaǵynda qazir USS Abraham Lincoln ushaqtasyǵash toby bar. Ekinshi ushaqtasyǵysh USS Gerald R.Ford Batys Azııaǵa baǵyttalǵan jáne qazirgi ýaqytta Afrıkanyń batys jaǵalaýynda ornalasqan, dep habarlaıdy teńizdi baqylaý qyzmetteri.
Aq úı baspasóz hatshysy Karolın Lıvıtt Iranǵa soqqy berýge «kóptegen argýment» bar ekenin aıtty, biraq dıplomatııa prezıdent úshin basty prıorıtet bolyp qala beredi dep atap ótti.
Sonymen qatar ákimshilik maýsymdaǵy Irannyń ıadrolyq obektilerine qarsy operatsııany sátti dep baǵalaıdy.
Sonymen birge, Tegeran men Vashıngton arasynda Irannyń ıadrolyq baǵdarlamasy boıynsha janama kelissózder jalǵasyp jatyr. AQSh tarapynan belgili bolǵandaı, belgili bir progress bar, biraq keıbir negizgi máseleler boıynsha kelispeýshilikter saqtalyp otyr.
Al Irannyń joǵary jetekshisi Alı Hameneı áleýmettik jelilerde «Djerald Ford» ushaqtasyǵyshtyń teńiz túbinde beınesin jarııalap, áskerı kemeden qaýiptisi ony túbine jiberetin qarý ekenin aıtty.
A weapon more dangerous than a warship pic.twitter.com/EzmvUt7Hjp
— Khamenei Media (@Khamenei_m) February 17, 2026
Iran bıligi sonymen qatar pılottarǵa josparlanǵan jattyǵýlar men zymyran synaqtaryna baılanysty eldiń ońtústik aımaqtarynan aýlaq bolýdy eskertti.
19 aqpanda bastalǵan «Qaýipsizdik teńiz beldeýi» atty Reseı, Qytaı jáne Iran birlesken áskerı-teńiz jattyǵýlary Orzmýz buǵazynda jarııalandy.
Aıta ketelik Jenevada AQSh pen Iran arasyndaǵy ıadrolyq kelissózderdiń ekinshi raýndy aıaqtaldy.