Tramp: Iranǵa qarsy joıqyn soqqylardan keıin soǵys 2–3 aptada aıaqtalady
ASTANA. KAZINFORM — AQSh prezıdenti Donald Tramp Amerıka Qurama Shtattary Irandaǵy áskerı maqsattarynyń basym bóligin oryndap bolǵanyn jáne operatsııany jaqyn arada aıaqtaýdy kózdep otyrǵanyn málimdedi. Bul týraly Anadolý agenttigi jazdy.
Aq úıde halyqqa arnaǵan úndeýinde Tramp Iran tóńiregindegi qazirgi ahýalǵa toqtalyp, AQSh barlyq áskerı mindetterin qysqa merzim ishinde aıaqtap qalatynyn aıtty. Sonymen qatar aldaǵy 2–3 apta ishinde Vashıngton Iranǵa «óte qatań soqqy» jasaıtynyn eskertti.
Prezıdenttiń aıtýynsha, «Epıkalyq qahar» dep atalǵan operatsııa bastalǵaly beri AQSh alǵa qoıǵan maqsattarynyń kópshiligine qol jetkizgen.
– Búgin keshke aıtarym, biz negizgi strategııalyq maqsattardy aıaqtaýǵa jaqyndadyq. Amerıka barlyq áskerı mindetterin óte qysqa merzimde aıaqtaýǵa bet aldy, alaıda aldaǵy 2–3 aptada biz olarǵa óte qatań soqqy jasaımyz, — dedi Donald Tramp.
Sondaı-aq AQSh basshysy bul shabýyldardan keıin Iran «tas ǵasyrǵa keri sheginedi» dep málimdedi.
Tramp budan bólek Izraılge, Saýd Arabııasyna, Qatarǵa, Birikken Arab Ámirlikterine, Kýveıt pen Bahreınge alǵys aıtyp, AQSh olardyń qorǵanys salasyndaǵy qoldaýyn jalǵastyratynyn jetkizdi.
Prezıdent Irandaǵy maqsattarynyń eshqashan bılikti aýystyrý bolmaǵanyn aıtqanymen, joǵary basshylyqtaǵy tulǵalardyń joıylýy is júzinde «rejım aýysýyna» alyp kelgenin alǵa tartty.
Onyń aıtýynsha, eger osy kezeńde kelisimge qol jetkizilmese, AQSh Irandaǵy barlyq elektr stansalaryna soqqy berýi múmkin.
Sonymen birge Tramp Irannyń munaı nysandaryna shabýyl jasalmaıtynyn, óıtkeni «sol el halqyna múmkindik bergisi keletinin» málimdedi.
Ormýz buǵazy máselesine toqtalǵan AQSh prezıdenti bul baǵyt arqyly ótetin munaıǵa Vashıngton táýeldi emes ekenin aıtyp, osy marshrýtpen munaı alatyn elder onyń qaýipsizdigin ózderi qamtamasyz etýge tıis ekenin atap ótti.
– Bizge bul qajet emes. Ormýz buǵazy arqyly munaı alatyn memleketter osy ótkeldi ózderi qorǵaýy kerek. Olar ony baqylaýǵa alyp, mańyzyn túsinýi tıis, — dedi ol.
Sondaı-aq Donald Tramp AQSh-tyń munaı qory Reseı men Saýd Arabııasynyń jıyntyq qorynan da kóp ekenin aıtyp, eldiń Taıaý Shyǵys energııa resýrstaryna táýeldi emes ekenin málimdedi.
Onyń sózinshe, Venesýeladaǵy áskerı operatsııadan jáne sol elden munaı jetkizýden keıin AQSh Taıaý Shyǵys munaıynan tolyq táýelsizdikke qol jetkizgen.
Eske sala ketsek, Belgııa bıligi Ormýz buǵazyn ashýǵa, sonyń ishinde mınasyzdandyrý arqyly úles qosýǵa daıyn ekenin málimdedi.
Al Aq úıde teńdesi joq jańa Saltanat zaly salynatynyn málimdegen Tramp ózin AQSh tarıhyndaǵy eń baqytty prezıdent ekenin aıtty.
