Tramp Iranǵa qarsy aýqymdy áskerı operatsııa bastaǵanyn málimdedi

ASTANA. KAZINFORM — Donald Tramp AQSh-tyń Iranǵa qarsy «kóp masshtabty áskerı operatsııa» bastaǵanyn rastady. Bul týraly Izraıl Tegeranǵa raketalyq soqqy jasaǵanyn málimdegennen keıin belgili boldy.

AQSh Prezıdenti áleýmettik jelide Truth Social paraqshasynda segiz mınýttyq beınemálimdeme jarııalap, shabýyldar «amerıkalyq halyqty qorǵaý úshin baǵyttalǵan» dedi.

— Amerıka Qurama Shtattarynyń saıasaty, meniń ákimshiligimniń saıasaty, bul terrorıstik rejım eshqashan ıadrolyq qarýǵa ıe bolmaýy tıis degenge negizdelgen. Qaıtalap aıtamyn, olar eshqashan ıadrolyq qarýǵa ıe bolmaıdy, — dedi Tramp óz beıne málimdemesinde.

Sonymen qatar, ol AQSh-tyń Iranmen ıadrolyq kelissózder boıynsha «taýsylǵan shydamyn» eskerip, áskerı operatsııa bastaýǵa májbúr bolǵanyn atap ótti.

Aq úı basshysy AQSh-tyń Irannyń barlyq raketalyq arsenalyn joıýdy kózdeıtinin málimdedi.

— Biz olardyń raketalaryn joıamyz jáne raketalyq óndirisin jermen jeksen etemiz, — dedi Tramp.

Ol sondaı-aq Islam revolıýtsııasy saqshylary korpýsy (KSIR) men Iran polıtsııasyna qarýyn tapsyrýdy talap etti, olardyń ornyna tolyq qaýipsizdik jáne amandyqty qamtamasyz etýdi usyndy.

— Men Iran polıtsııasy men qaýipsizdik kúshterine aıtamyn: dereý qarýlaryńyzdy tapsyryńyzdar, áıtpese mezgilsiz ajal qushasyzdar. Iran halqy, azattyqtyń ýaqyty keldi. Úıde bolyńyzdar jáne syrtqa shyqpańyzdar, kóshede qaýipti. Biz aıaqtaǵan kezde sizder óz úkimetterińizdi basqarasyzdar. Bul rejımdi qulatý úshin sizderdiń bir ǵana múmkindikterińiz bar, — dep atap ótti amerıkandyq kóshbasshy.

Aıta keteıik, búgin tańerteń Izraıl Tegeranǵa qarsy soqqy jasaǵany týraly habarlaǵan bolatyn.