Tramp Iranǵa qarsy áskerı operatsııany qaıta bastaý ázirge ekitalaı ekenin aıtty
ASTANA. KAZINFORM – AQSh prezıdenti Donald Tramp Iranǵa qatysty áskerı qysymdy saqtaýǵa jáne qajet bolǵan jaǵdaıda soqqylardy qaıta bastaýǵa daıyn ekenin málimdedi. Bul týraly ol Katar premer-mınıstri sheıh Muhammed bın Abdýlrahman bın Djassım Ál Tánımen áńgimeleskennen keıin Truth Social áleýmettik jelisindegi paraqshasynda jazdy.
Onyń aıtýynsha, Parsy shyǵanaǵyndaǵy birqatar el de qazirgi blokadanyń jalǵasýyn qalaıdy. Sondaı-aq áńgime barysynda Iran Islam Respýblıkasyna qatysty kóptegen másele talqylanǵan.
– Qatar, Saýd Arabııasy, BAÁ, Bahreın, Kýveıt jáne basqa da elder qazirgi jaǵdaıdyń saqtalǵanyn, ıaǵnı tarıhtaǵy eń iri teńiz blokadasynyń jáne jańa «Temir qaqpa» operatsııasynyń – qurlyq pen teńizdegi sharalardyń jalǵasqanyn qalaıtyny eń mańyzdy másele boldy, – dep jazdy AQSh prezıdenti.
Tramp Irannyń ıadrolyq qarýǵa ıe bolmaýy kerektigi jóninde barlyq taraptyń ortaq pikirge kelgenin atap ótti.
– Barlyǵy Irannyń ıadrolyq qarýy bolmaýy kerek degen pikirge kelisti. Bul másele talqylaýǵa jatpaıdy! Eger Taıaý Shyǵystaǵy jaǵdaı ózgerse, Amerıka Qurama Shtattary áreket etýge tolyq daıyn. Alaıda qazirgi ýaqytta mundaı jaǵdaıdyń týyndaýy ekitalaı sııaqty. Izraıl men búkil Taıaý Shyǵys Irannan tónetin qaýip-qaterden qorǵalǵan, – dep jazdy ol.
Sondaı-aq AQSh prezıdenti qaqtyǵysty toqtatý baǵytynda oń ózgerister baıqalyp otyrǵanyn jáne Amerıka múddesi árdaıym qorǵalatynyn málimdedi.
– Biz bul qaqtyǵysty toqtatý baǵytynda oń dınamıkany baıqap otyrmyz jáne Amerıkanyń múddesi árdaıym qorǵalatynyna kepildik beremiz. Bul áskerı teketires aıaqtalǵannan keıin Amerıka halqy men búkil álem áldeqaıda qaýipsiz jaǵdaıda bolady, – dedi Tramp.
Reuters agenttigine bergen suhbatynda AQSh prezıdenti Qatar men Saýd Arabııasynyń Iranmen qaqtyǵysty beıbit jolmen sheshýge múddeli ekenin aıtqan. Sonymen birge Vashıngton qajet bolǵan jaǵdaıda áskerı soqqylardy qaıta bastaýǵa daıyn ekenin eskertken.
– Qatar beıbit sheshim bolǵanyn qalaıdy. Saýd Arabııasy da beıbit sheshimdi jón kóredi. Biraq biz kez kelgen ýaqytta áreket etýge daıynbyz, – degen Tramp agenttikke bergen telefon suhbatynda.
Onyń aıtýynsha, ázirge AQSh Iranǵa qarsy jańa soqqylar jasaýǵa asyqpaıdy. Vashıngton Ormýz buǵazyndaǵy teńiz blokadasyn saqtaýdy kózdep otyr. «Jaǵdaıdyń qalaı órbıtinin kóreıik. Men daıynmyn», – degen ol.
Associated Press agenttiginiń habarlaýynsha, Tramp Qatar premer-mınıstrimen kezdeskennen keıin Aq úıde jýrnalısterge Iranmen soǵys áskerı turǵydan is júzinde aıaqtalǵanyn málimdegen.
– Irannyń áskerı áleýeti is júzinde joıyldy. Biz qazirgi jaǵdaıdy saqtap otyrmyz, – dedi AQSh prezıdenti.
Onyń aıtýynsha, Irannyń áskerı basshylyǵy men basqarý qurylymyna aýyr soqqy berilgen. Degenmen Vashıngton Tegerannyń ıadrolyq baǵdarlamasyn uzaq merzimdi perspektıvada beıtaraptandyrýǵa kepildik beretin kelisimge qol jetkizýdi kózdeıdi.
Aıta keteıik, buǵan deıin AQSh pen Iran ýran baıytý deńgeıin tómendetý jóninde kelisýi múmkin ekenin jazdyq.
Sondaı-aq AQSh Irannyń ıadrolyq baǵdarlamasy týraly aqparat úshin 20 mln dollar usynyp otyr.
