Tramp: Iranǵa qarsy áskerı operatsııa qajet bolǵansha jalǵasady

ASTANA. KAZINFORM — AQSh Qarýly kúshteri Tegerannyń ıadrolyq jáne zymyrandyq múmkindikterin joıýǵa baǵyttalǵan Iran aýmaǵyndaǵy aýqymdy operatsııalardy jalǵastyryp jatyr. Prezıdent Donald Tramp Aq úıde sóılegen sózinde operatsııanyń basty maqsaty — Irannyń ıadrolyq qarý jasaýyna jol bermeý jáne Eýropa men AQSh-qa tónetin qaýipti beıtaraptandyrý ekenin málimdedi, dep habarlaıdy Kazinform agenttigi.

Tramp áskerı operatsııanyń qajettiligine qatysty ýájderin keltirip, Iran AQSh úshin «eleýli qaýip» tóndirip otyrǵanyn aıtty. Sonymen qatar ol ótken jyldyń maýsym aıynda AQSh-tyń Iranǵa jasaǵan soqqylary ırandyq ıadrolyq baǵdarlamanyń joıylýyna alyp kelgenin taǵy da eske saldy.

«Iran bizdiń eskertýlerimizdi elemeı, ıadrolyq qarýǵa umtylyp otyr. Onyń ballıstıkalyq zymyran baǵdarlamasy qarqyndy damyp keledi jáne qazirdiń ózinde Eýropaǵa jete alady, al kóp uzamaı AQSh-qa da jetýi múmkin. Bizdiń elge qaýip tóner edi, tipti ol qaýip burynnan bar», dep atap ótti Tramp.

Prezıdenttiń aıtýynsha, úderis kútilgen merzimnen jyldam júrip jatyr, Irannyń áskerı jetekshilerin joıý protsesi de josparlanǵannan tezirek júzege asyp keledi.

«Biz Iran flotyn joıyp jatyrmyz jáne ırandyq 10 kemeni atyp túsirdik. Soqqylar tórt-bes aptaǵa sozylady dep kútip otyrmyz, biraq odan da uzaqqa jalǵasýy múmkin. Biz qajet bolǵansha soǵysýǵa daıynbyz. Bizde álemdegi eń qýatty armııa bar. Qansha ýaqyt qajet bolsa da, biz maqsatymyzǵa jetemiz», dedi amerıkalyq kóshbasshy.

Tramptyń sózinshe, basty maqsat ózgermeıdi. Ol — ırandyq rejımniń ıadrolyq qarýǵa qol jetkizýine jol bermeý.

«Men muny basynan bastap aıtyp kelemin – olarda eshqashan ıadrolyq qarý bolmaıdy», dedi Aq úı basshysy.

Aıta keteıik, Pentagon Iranǵa jasalǵan soqqy týraly alǵash ret málimdeme jasady. Pentagon basshysy Pıt Hegset AQSh pen Izraıldiń áreketteri Irannyń AQSh qarýly kúshteri men álemdegi amerıkalyq múddelerge baǵyttalǵan kópjyldyq shabýyldaryna jaýap bolǵanyn málimdedi.