Tramp Iranǵa qarsy áskerı áreketterdiń jalǵasatynyn málimdedi

ASTANA. KAZINFORM — AQSh prezıdenti Donald Tramp Iranǵa qarsy áskerı operatsııa qoıylǵan mindetter tolyq oryndalǵanǵa deıin jalǵasatynyn habarlady. Bul týraly ol óziniń Truth Social platformasynda jazdy.

Amerıkalyq kóshbasshynyń aıtýynsha, sońǵy 36 saǵat ishinde AQSh óz odaqtastarymen birge «Epıkalyq qahar» atty aýqymdy operatsııany bastady.

«AQSh jáne olardyń seriktesteri álem kórgen eń iri ári eń kúrdeli áskerı shabýyl operatsııalarynyń birin bastady», dedi Tramp Truth Social áleýmettik jelisinde jarııalanǵan beıneúndeýinde.

Ol soqqylar júzdegen nysandarǵa baǵyttalǵanyn habarlady, onyń ishinde Islam revolıýtsııasy gvardııasynyń ınfraqurylymy jáne áýe qorǵanys júıeleri bar.

«Biz Irandaǵy júzdegen nysanǵa soqqy jasadyq, onyń ishinde Revolıýtsııalyq gvardııa obektileri men Irannyń áýe qorǵanys júıeleri bar. Biz toǵyz kemeni jáne olardyń áskerı-teńiz nysanyn birneshe mınýt ishinde talqandadyq», dedi AQSh prezıdenti.

Aq úı basshysy sondaı-aq Irannyń joǵarǵy basshysy Alı Hameneı qaıtys bolǵanyn málimdedi.

«Bul adam kóptegen elde sansyz myńdaǵan beıbit turǵynnyń qazasyna kináli boldy», dedi Tramp.

Onyń aıtýynsha, áskerı áreketter jalǵasyp jatyr.

«Qazirgi ýaqytta áskerı áreketter tolyq kólemde jalǵasyp jatyr jáne bizdiń barlyq maqsattarymyz oryndalǵanǵa deıin toqtamaıdy. Bizde óte mańyzdy maqsattar bar», dep atap ótti amerıkalyq kóshbasshy.

Eske sala ketsek, «Epıkalyq qahar» operatsııasynyń alǵashqy táýliginde Irannyń 1000-nan astam nysany joıyldy.

Al Ulybrıtanııa AQSh-qa Iranǵa qarsy óz Áýe kúshteriniń bazalaryn paıdalanýǵa kelisti.