Tramp Iranǵa 300 mlrd dollar tólengeni týraly aqparatty jalǵan dep atady
ASTANA. KAZINFORM — AQSh Iran úshin kólemi 300 mıllıard dollarǵa deıin jetýi múmkin ınvestıtsııalyq qor qurý máselesin talqylap jatyr. Alaıda AQSh prezıdenti Donald Tramp Tegeranǵa yqtımal tólemder týraly habarlardy «jalǵan aqparat» dep atady.
AQSh ákimshiligi Iran ekonomıkasyna jeke kapıtal tartý úshin kólemi 300 mıllıard dollarǵa deıin jetýi múmkin ınvestıtsııalyq qor qurý múmkindigin qarastyryp jatyr. Bul týraly Financial Times agenttigi habarlady.
Basylym málimetinshe, sóz Iranǵa tikeleı memlekettik qarjy bólý nemese aqsha aýdarý týraly emes. Qor Iran naryǵyna shyǵýǵa múddeli jeke ınvestorlar men kompanııalardyń qarajaty esebinen qurylýy múmkin.
Buǵan deıin AQSh vıtse-prezıdenti Djeı Dı Vens bolashaqta Vashıngtonmen jasalatyn kelisimsharttaryn oryndaǵan jaǵdaıda Irannyń qalpyna keltirý qoryna qol jetkize alatynyn málimdegen edi.
Yqtımal ınvestıtsııalarǵa Eýropa men Azııanyń, sonyń ishinde Ońtústik Koreıa jáne Japonııa kompanııalary qyzyǵýshylyq tanytyp otyr. Sonymen qatar amerıkalyq kompanııalar da jobaǵa qatysý múmkindigin qarastyryp jatyr.
Jobany iske asyrý túpkilikti kelisimderge qol jetkizilgen jaǵdaıda ǵana múmkin bolmaq. Talqylanyp jatqan sharttardyń qatarynda 60 kúndik bitim rejımin uzartý, Ormýz buǵazy arqyly erkin keme qatynasyn qamtamasyz etý jáne Irannyń ıadrolyq baǵdarlamasy boıynsha kelissózderdi jalǵastyrý bar.
Al AQSh prezıdenti Donald Tramp Vashıngton Iranǵa júzdegen mıllıard dollar bólmek degen aqparatty teriske shyǵardy.
— AQSh Iranǵa 300 mıllıard dollar tóleıdi degen jarııalanym — faktilerdi ádeıi burmalaý, — dep jazdy Tramp Truth Social áleýmettik jelisinde.
Aq úı basshysy AQSh úkimeti tarapynan Iranǵa eshqandaı tólem qarastyrylmaǵanyn atap ótip, mundaı jalǵan aqparat taratqany úshin demokrattardy synǵa aldy.
Eske salaıyq, AQSh pen Iran 19 maýsym kúni Shveıtsarııada beıbit kelisimge qol qoıady. Osydan keıin Iran men AQSh arasyndaǵy kelisimniń egjeı-tegjeıi belgili boldy. Eki el 14 tarmaqtan turatyn ózara túsinistik týraly memorandým jobasyn jarııalady. AQSh pen Iran arasyndaǵy kelisimnen keıin munaı baǵasy tómendedi.
