Tramp Iranǵa 10-15 kún ýaqyt berdi
ASTANA. KAZINFORM – Vashıngton Taıaý Shyǵystaǵy áskerı qatysýyn kúsheıtip, sonymen qatar Iranǵa shekteýli soqqylar jasaý múmkindigin de joqqa shyǵarmaı otyr., dep habarlaıdy Kazinform menshikti tilshisi.
AQSh prezıdenti Donald Tramp Irannyń 10-15 kún ishinde «mańyzdy» ıadrolyq kelisimge qol jetkizýi qajet ekenin, áıtpese «saldary óte jaman» bolatynyn málimdedi. Ol bul týraly beısenbi kúni Vashıngtonda ózi qurǵan Beıbitshilik keńesiniń otyrysynda sóılegen sózinde habarlap, sodan keıin bul sózderin Air Force One bortynda tilshilerge rastady.
— Áıtpese, jaman nárseler bolady, — dep atap ótti Tramp, Tegeran kelisimge kelýge daıyn ekenin kórsetýi kerek «eń kóbi — shamamen 10-15 kún» ekenin qosty.
AQSh osy málimdemeler aıasynda aımaqta keń aýqymdy áskerı kúsh jınaýdy jalǵastyryp otyr: Taıaý Shyǵys jaǵalaýlaryna áýetasymaldaǵyshtar, áskerı kemeler jáne joıǵysh ushaqtar jiberildi. AQSh-tyń bir sheneýnigi Reuters agenttigine kúshterdi ornalastyrý naýryzdyń ortasyna deıin aıaqtalýy kerek ekenin habarlady. Tramp Irannyń ıadrolyq ınfraqurylymyna jasalǵan burynǵy shabýyldardy eske salyp, Tegerannyń múmkindikteri «aıtarlyqtaı álsiregenin» málimdedi, biraq odan ári qadamdardy joqqa shyǵarǵan joq.
Osy arada The Wall Street Journal basylymy ákimshiliktiń talqylaýlarymen tanys derekkózderge silteme jasaı otyryp Tramptyń Irannyń birneshe áskerı nemese úkimettik nysandaryna aldyn ala, shekteýli soqqylar jasaýdy qarastyryp jatqanyn habarlady.
Basylymnyń málimetinshe, mundaı áreketter prezıdenttiń sońǵy maquldaýyna baılanysty birneshe kún ishinde jasalýy múmkin.
Jazbaǵa sáıkes, shıelenistiń birtindep ýshyǵý stsenarııi shamalanyp otyr: eger Iran ýrandy baıytýdy jalǵastyra berse, AQSh áskerı operatsııany keńeıtip, sonyń ishinde el basshylyǵymen baılanysty nysandarǵa soqqylar jasaı alady.
Gazet derekkózderiniń biri Tramptyń «shekteýli áreketterden» bastaýy, Iran tarapy ıadrolyq baǵdarlamasyn toqtatýǵa kelispeıinshe nemese odan da aýyr zardaptarǵa tap bolmaıynsha qysymdy kúsheıtýi múmkin ekenin atap ótti. Shıelenistiń artýy álemdik naryqtarǵa áser etti, munaı baǵasy odan ári ýshyǵý qaýpine baılanysty kóterildi.
AQSh pen Iran sheneýnikteri arasyndaǵy kelissóz Omannyń deldaldyǵymen jalǵasyp otyr. Tramptyń aıtýynsha, «jaqsy kelissóz júrip jatyr», alaıda eki tarap birqatar mańyzdy máseleler boıynsha, sonyń ishinde baıytý baǵdarlamasynyń bolashaǵy jáne Vashıngtonnyń Tegerannyń zymyran baǵdarlamasy men aımaqtyq belsendiligine qatysty qosymsha talaptary boıynsha áli de kelispeı otyr.
Osyǵan deıin Tramp Iranǵa shabýyldy senbi kúni maquldaýy múmkin ekenin jazdyq.
Keıin ol Iranmen kelisimniń jaǵdaıy 10 kún ishinde anyqtalatynyn málimdedi.