Tramp Irandaǵy ushqyshtyń qutqarylýy týraly aqparat taratqandar sottalady dep qorqytty
ASTANA.KAZINFORM - AQSh prezıdentiniń aqparattyń shyǵý kózin izdeý týraly málimdemeleri BAQ-qa degen qysymdy kúsheıtti.
AQSh prezıdenti Donald Tramp amerıkalyq joıǵysh ushaq apatynan keıin Iranda qalyp qoıǵan eki ushqyshtyń birin qutqarý týraly BAQ-qa aqparat jarııalaǵan derekkózdi anyqtaýǵa tyrysyp jatqanyn málimdedi.
Ol bul aqparattyń jarııalanýy ekinshi áskerı qyzmetshini qutqarý operatsııasyna qaýip tóndirýi múmkin dep málimdedi, sebebi Vashıngtonnyń málimetinshe, Iran BAQ habarlamalary paıda bolǵanǵa deıin bul jaǵdaıdan beıhabar bolǵan.
-Biz aqparatty jarııalaǵan adamdy tabý úshin jumys istep jatyrmyz, - dedi Tramp.
Ol bılik organdarynyń BAQ-tan aqparattyń tarap ketý kózin anyqtaýdy talap etti jáne olar bul týraly aıtpasa, qylmystyq jaýapkershilikke tartylatynyn eskertti.
-Biz BAQ-qa habarlasyp, ulttyq qaýipsizdik múddesi úshin derekkózdi ashyńyz, áıtpese túrmege túsesizder dep eskertemiz, - dep atap ótti AQSh prezıdenti.
Alaıda, Tramp qaı BAQ-qa silteme jasap otyrǵanyn naqtylamady. Birneshe amerıkalyq basylym, sonyń ishinde The New York Times, CBS News jáne Axios, oqıǵadan keıin kóp uzamaı birinshi ushqyshtyń qutqarylǵany týraly habarlaǵan bolatyn.
Juma kúni amerıkalyq joıǵysh ushaq Iranda qulaǵannan keıin keıin birneshe BAQ borttaǵy eki ushqyshtyń birin amerıkalyq qutqarý kúshteri sátti qutqaryp, evakýatsııalaǵanyn habarlady.
Tramp bul aqparatty jarııalaý ekinshi Áýe kúshteriniń áskerı qyzmetshisin qutqarý operatsııasynyń qaýipsizdigine kedergi keltiredi dep málimdedi.
Tramptyń Aq úıdegi baspasóz máslıhatyndaǵy málimdemeleri ákimshiliktiń baspasózge shabýyldaryn aıtarlyqtaı kúsheıtti.
Reuters agenttiginiń habarlaýynsha, sońǵy aptalarda AQSh prezıdenti kómekshilerine AQSh-Izraıl soǵysy týraly BAQ-tyń tym teris habarlaýy týraly jeke shaǵymdanǵan, al Tramptyń ózi jáne onyń odaqtastary keıbir jańalyqtar uıymdarynyń oqıǵalardy jarııalaýyn ashyq synǵa alǵan.
Ótken aptada biz Irannyń amerıkalyq ushaqtardy atyp túsirgenin málimdegenin jáne ushqyshty izdeý jumystary júrip jatqanyn habarlaǵan edik.
