Tramp: Irandaǵy áskerı operatsııa uzaqqa sozylýy da, 2–3 kúnde aıaqtalýy da múmkin
ASTANA. KAZINFORM — AQSh-tyń Irandaǵy áskerı operatsııasynan keıin shıelenisti báseńdetýdiń birneshe «shyǵý joly» bar. Bul týraly AQSh prezıdenti Donald Tramp Axios basylymyna bergen suhbatynda málimdedi, dep habarlaıdy DW.
— Men uzaq joldy tańdap, bárin tolyq baqylaýǵa ala alamyn nemese eki-úsh kúnde aıaqtap, ırandyqtarǵa «Eger birneshe jyldan keıin ıadrolyq baǵdarlamańyzdy qaıta jandandyra bastasańyzdar, qaıta kezdesemiz» dep aıta alamyn, — dedi ol.
Tramp Irandaǵy operatsııaǵa «jasyl jaryq» bergenin, sebebi ıadrolyq kelissózderde ilgerileý bolmaǵanyn atap ótti.
— Irandyqtar kelisimge bir jaqyndap, keıin qaıta sheginip otyrdy, jaqyndap, shegindi. Osydan olardyń shyn máninde kelisim jasaǵysy kelmeıtinin túsindim, — dedi AQSh prezıdenti.
Eske salaıyq, buǵan deıin Izraıl Iranǵa soqqy jasaǵan. Keıin Donald Tramp Iranǵa qarsy aýqymdy áskerı operatsııanyń bastalǵanyn jarııalaǵan.
Iran Izraıldiń soltústik jáne ortalyq aımaqtaryna zymyrandar atqan.
Jergilikti buqaralyq aqparat quraldarynyń Qyzyl Jarty Aıǵa silteme jasaýynsha, Iranda 201 adam qaza taýyp, 747 adam jaralanǵan.
