Tramp: Iran Ormýz buǵazyn ashýdy surap otyr

ASTANA. KAZINFORM – AQSh prezıdenti Donald Tramp Iran Vashıngtonnan Ormýz buǵazyn ashýdy surap otyrǵanyn málimdedi, dep habarlaıdy Deutsche Welle.

Amerıkalyq kóshbasshynyń aıtýynsha, Tegeran el ishinde kúrdeli jaǵdaıǵa tap bolyp, «kollaps kúıinde» ekenin jetkizgen.

– Olar basshylyqtaǵy jaǵdaıdy rettep alǵansha, Ormýz buǵazyn múmkindiginshe tezirek ashýymyzdy qalaıdy, – dedi Donald Tramp.

Alaıda bul aqparattyń qandaı arna arqyly alynǵany naqtylanbaǵan. Reuters agenttigi de bul málimettiń naqty derekkózi kórsetilmegenin atap ótti.

Óz kezeginde Irannyń syrtqy ister mınıstri Abbas Aragchı AQSh-tyń ózi kelissózderge múddeli ekenin málimdegen. Onyń aıtýynsha, Vashıngton áskerı qaqtyǵysta óz maqsattaryna jete almaǵan.

Reuters dereginshe, Iran usynǵan beıbit retteý jospary úsh kezeńnen turady. Aldymen AQSh tarapynan áskerı áreketterdi qaıta bastamaý kepildigi berilýi tıis. Keıin Ormýz buǵazy ırandyq saýda kemeleri úshin ashylyp, onyń bolashaqtaǵy mártebesi anyqtalýy qajet. Tek osydan keıin ǵana Tegeran ózge máselelerdi, sonyń ishinde ıadrolyq baǵdarlamany talqylaýǵa daıyn.

Aıta keteıik, Ormýz buǵazy arqyly álemdik munaıdyń shamamen 20%-y tasymaldanady.